ඉන්දු - ලංකා යුද හමුදා අම්පාරේ අභ්‍යාසයක..

COLOMBO (NEWS1ST) : ඉන්දු - ලංකා මිත්‍ර ශක්ති යුද හමුදා ඒකාබද්ධ අභ්‍යාසය මේ දිනවල අම්පාරේ ක්‍රියාක්මක වෙයි.

එහි ප්‍රායෝගික පුහුණු සැසියක් පෙරේදා අම්පාර නගරයේ පැවැත්විය. ත්‍රස්ත මර්දන කටයුතුවලට අමතරව අභ්‍යන්තර කැරළි කෝලාහල මැඩලීම ගැනත් එහිදී අභ්‍යාසවල නිරත වී තිබුණි. මේ අතර ඉන්දු - පැසිෆික් සාගර කලාපය ආශ්‍රිතවද මේ වනවිට ආරක්ෂක කටයුතු සම්බන්ධයෙන් ක්‍රියාකාරකම් රැසක් සිදුවෙමින් තිබේ. පසුගියදා මෙරටට පැමිණි ජපාන නාවික ස්වයං ආරක්ෂක බලකායේ මුරසාමේ සහ කාගා යුද නැව් කොළඹ වරායෙන් පිටත්වී තිබුණේ ඉන්දීය නාවික හමුදාව සමග අරාබි මුහුදේ යුද අභ්‍යාසයක් සඳහා ය. ජිමික්ස් ටුවෙන්ටි වන් නමින් හඳුන්වන තුන්දින යුද අභ්‍යාසය ඊයේ (08) අවසන් විය. ජපාන යුද නැව් කොළඹට පැමිණියේ, මලක්කා සමුද්‍ර සන්ධියේදී අමෙරිකානු නාවික හමුදාව සමග තවත් අභ්‍යාසයක නිරතවීමෙන් පසුව ය. මේ අතර දකුණු චීන මුහුදේදී අමෙරිකානු නාවික හමුදාවේ පැසිෆික් බලගනයට අයත් න්‍යෂ්ඨික බලයෙන් ක්‍රියාත්මක සම්මැරීනයක් හඳුනා නොගත් යමක ගැටී අනතුරට ලක්වී තිබේ. විදෙස් මාධ්‍ය වාර්තා කළේ, ඔක්තෝම්බර් 02 වැනිදා සිදුව ඇති මෙම අනතුරෙන් නාවිකයින් 11 දෙනෙකු තුවාල ලබා ඇති බවය. සබ්මැරීනයේ න්‍යෂ්ටික බලශක්ති තැන්පත් කොටසට හැනි සිදුව නොමැති බවත් සබ්මැරීනය ක්‍රියාත්මක තත්ත්වයේ පවතින බවත් විදෙස් මාධ්‍ය සඳහන් කළේ ය. දකුණු චීන මුහුදේ චීන ක්‍රියාකාරකම් හේතුවෙන් ඇමරිකාව ප්‍රමුඛ ඉන්දු පැසිෆික් නිදහස් ප්‍රවේශය ඉල්ලා සිටින රටවල් මේ දිනවල විවිධ ක්‍රියාකාරම්වල නිරතවෙමින් සිටී. මේ අතර තායිවානය පවසන්නේ , චීනය 2025 වනවිට තම රට ආක්‍රමණය කරනු ඇති බවය. නමුත් ඒ සඳහා චීනයට ප්‍රතිවිපාක විදින්නට සිදුවනු ඇති බව තායිවාන ආරක්ෂක අමාත්‍යවරයා පවසයි.