අමෙරිකාවේ පරිත්‍යාගයක් ලෙස තවත් ෆයිසර් එන්නත් මාත්‍රා 100,000ක් මෙරටට

COLOMBO (NEWS1ST) : තවත් ෆයිසර් එන්නත් මාත්‍රා ලක්ෂයකට අධික සංඛ්‍යාවක් අද(28) දිවයිනට ලැබී තිබේ.

සෞඛ්‍ය අමාත්‍ය කෙහෙළිය රඹුක්වැල්ල මහතා පැවසුවේ, කොවැක්ස් පහසුකම හරහා අමෙරිකාවේ පරිත්‍යාගයක් ලෙස එම එන්නත් මාත්‍රා තොගය මෙරටට ලැබුණු බවයි. ශ්‍රී ලංකාවේ අමෙරිකානු තානාපති ඇලෙයිනා ටෙප්ලිට්ස් මහත්මිය විසින් සෞඛ්‍ය අමාත්‍යවරයාට තානාපති කාර්යාල නිල නිවසේදී එම පරිත්‍යාගය භාරදෙනු ලැබිණි. එහිදී අදහස් දැක්වූ කෙහෙළිය රඹුක්වැල්ල මහතා සඳහන් කළේ, වසංගතයට එරෙහිව සටන් කිරීම සඳහා අමෙරිකාව ලබාදෙන සහයෝගය මිල කළ නොහැකි බවය. මේ වසර අවසන් වනවිට මෙරට ජනතාව පූර්ණ එන්නත්කරණයට ලක් කිරීමට කටයුතු කරමින් සිටින බවත්, අගෝස්තු 26 වැනිදා වනවිට ජනගහනයෙන් 25% ක් පූර්ණ එන්නත්කරණයට ලක් කිරීමට හැකි වූ බවත් අමාත්‍යවරයා එහිදී පැවසුවේ ය. කොරෝනා මරණ අතරින් පූර්ණ එන්නත්කරණයට ලක්වූවන්ගේ මරණ අනුපාතය ඉතාම අඩු මට්ටමක් පෙන්නුම් කරන බව ද අමාත්‍යවරයා සඳහන් කළේ ය.