යුද හමුදාවේ ජංගම එන්නත්කරණ වැඩපිළිවෙළක් ඇරඹේ..

COLOMBO (News 1st) – ජාතික එන්නත්කරණ ක්‍රියාවලිය වේගවත් කරමින් යුද හමුදාව ජංගම එන්නත්කරණ වැඩපිළිවෙළ අද(12) ආරම්භ කළේය.

ජනාධිපතිතුමාගේ උපදෙස් මත කොවිඩ් - 19 පැතිරීම වැළැක්වීමේ ජාතික ක්‍රියාන්විත මධ්‍යස්ථාන ප්‍රධානී, ආරක්‍ෂක මාණ්ඩලික ප්‍රධානී සහ යුද හමුදාපති ජෙනරල් ශවේන්ද්‍ර සිල්වා මහතාගේ මගපෙන්වීම මත මෙම වැඩසටහන ක්‍රියාත්මක වේ. ජාතික එන්නත්කරණ වැඩසටහනට නව ප්‍රවිෂ්ටයක් එක්කරමින් බස්නාහිර පළාත තුළ තවමත් එන්නත් ලබාගෙන නොමැති වයෝවෘද්ධ පුරවැසියන් හා විවිධ අවශ්‍යතා සහිත පුද්ගලයින් ඉලක්ක කර ගනිමින් මෙම වැඩසටහන ක්‍රියාත්මක වේ. මෙහි සමාරම්භය යුද හමුදාපතිතුමා⁣ගේ ප්‍රධානත්වයෙන් අද(12) සනිටුහන් කරනු ලැබිණි. ඒ, යුද හමුදා මූලස්ථානයේදීය. ඒ අනුව පහත සඳහන් ස්ථානයන්හිදී ජංගම එන්නත්කරණ රථ ක්‍රියාත්මක් කරනු ලබයි. දෙමටගොඩ ප්‍රදේශය ආවරණය වන පරිදි ජංගම එන්නත්කරණ රථ 01 ක්, කොළඹ 15 - මෝදර ප්‍රදේශය ආවරණය වන පරිදි ජංගම එන්නත්කරණ රථ 03 ක්, ගංගාරාම මාවත - මට්ටක්කුලිය ප්‍රදේශය ආවරණය වන පරිදි ජංගම එන්නත්කරණ රථ 01 ක්, කොළඹ 14 - ග්‍රෑන්ඩ්පාස් ප්‍රදේශය ආවරණය වන පරිදි ජංගම එන්නත්කරණ රථ 03 ක්, කොළඹ 15 - බ්ලුමැන්ඩල් ප්‍රදේශය ආවරණය වන පරිදි ජංගම එන්නත්කරණ රථ 02 ක් වශයෙන් අද (12) දිනය පුරා රථ 10 ක් සහ වෛද්‍ය කාර්ය මණ්ඩලය මෙම එන්නත්කරණ ක්‍රියාවලිය සඳහා දායකත්වය ලබාදෙනු ඇත.