හෙට සිට සියලු රාජ්‍ය සේවකයින් සුපුරුදු පරිදි රාජකාරියට වාර්තා කළ යුතුයි...

COLOMBO (News 1st) – හෙට සිට සෞඛ්‍ය මාර්ගෝපදේශයන්ට යටත්ව සියලුම රාජ්‍ය සේවකයින් සාමාන්‍ය පරිදි රාජකාරියට වාර්තා කළ යුතු බව, රාජ්‍ය සේවා, පළාත් සභා හා පළාත් පාලන අමාත්‍යාංශය පවසයි.

එම අමාත්‍යාංශය පවසන්නේ, ඊට අදාළ චක්‍රලේඛය මේ වනවිට නිකුත් කර ඇති බවයි. එන්නත්කරණ වැඩපිළිවෙල යටතේ රාජ්‍ය නිලධාරින් බහුතරයක් එන්නත්කරණයට ලක් කර ඇති බැවින්, රජයේ කාර්යන් බිඳ වැටීමකින් තොරව සාමාන්‍ය පරිදි පවත්වාගෙන යාමට ප්‍රමුඛතාවය දිය යුතු බවට ජනාධිපති ලේකම්වරයා නිකුත් කළ උපදෙස් අනුව මෙම චක්‍ර‍ලේඛය නිකුත් කළ බව රාජ්‍ය සේවා, පළාත් සභා හා පළාත් පාලන අමාත්‍යංශය සඳහන් කළේ ය . එම අමාත්‍යංශය වැඩිදුරටත් සඳහන් කළේ, නව චක්‍රලේඛය මගින් ‍මීට පෙර නිකුත් කර ඇති, සීමිත කාර්ය මණ්ඩලයක් චක්‍රීය පදනම මත කැදවමින් සහ නිවෙස්වල සිටිමින් රාජකාරි කිරිමට අදාළව නිකුත් කර ඇති සියලුම චක්‍රලේඛ අවලංගු වන බවයි. ඒ අනුව රාජ්‍ය සේවයේ රැකියාවේ නියුතු ගර්භනී මව්වරුන් ද හෙට සිට සාමාන්‍ය පරිදි සේවයට වාර්තා කළ යුතු ය. කෙසේ වෙතත්, රාජකාරියට වාර්තා කළ නොහැකි මට්ටමේ විශේෂ අවශ්‍යතාවයක් සහිත රාජ්‍ය සේවකයෙකු සිටී නම් ඒ පිළිබදව අදාළ ආයතන බලධාරියා දැනුවත් කරන ලෙසද රාජ්‍ය සේවා, පළාත් සභා හා පළාත් පාලන අමාත්‍යංශය දැනුම් දෙයි. එම අමාත්‍යංශය සඳහන් කළේ, එවැනි අවශ්‍යතා සහිත පුද්ගලයින්ට රාජ්‍ය සේවයේ තමන්ට හිමි නිවාඩු ඇතුළු වරප්‍රසාද භාවිත කිරීමට කිසිදු බාධාවක් නොමැති බවයි.