සහල් තොග පවත්වා ගනිමින් සහල් මිල පාලනයට ගෙන ගිය වැඩපිළිවෙළ අසාර්ථකයි - ජාතික විගණන කාර්යාලය

COLOMBO (News 1st) - වෙළෙඳපොළේ සහල් හිඟයක් පවතින කාල සීමාවලදී ආරක්ෂිත සහල් තොග පවත්වා ගනිමින් සහල් මිල පාලනයට ගෙන ගිය වැඩපිළිවෙළ අසාර්ථක වී ඇතැයි ජාතික විගණන කාර්යාලය අවධාරණය කරයි.

එම කාර්යාලය පෙන්වා දෙන්නේ, 2012 වසර් සිට 2019 දෙසැම්බර් 31 දක්වා කාලසීමාව තුළ ආහාර කොමසාරිස් දෙපාර්තමෙන්තුවේ ගබඩා සතුව කිසිදු ආරක්ෂිත සහල් සංචිතයක් නොතිබූ බවයි. මේ හේතුවෙන් දෙපාර්තමේන්තුවේ අරමුණු ඉටු කර ගැනීම වෙනුවට වෙනත් රාජ්‍ය සහ පෞද්ගලික ආයතතනවල අරමුණු ඉටු කරදීම වෙනුවෙන් කටයුතු කෙරී ඇති බව එම වාර්තාවේ දැක්වේ. ආරක්ෂිත සහල් සංචිත පවත්වා ගෙන යෑම සඳහා ගබඩා උපයෝජනයේ කාර්ය සාධනය පිළිබඳව විශේෂ විගණන වාර්තාවක් ඉදිරිපත් කරමින් ජාතික විගණන කාර්යාලය මේ බව පෙන්වා දී ඇත. දෙපාර්තමේන්තුව සතුව පැවැති ගබඩා කුලියට ලබාදීමෙන් 2019 දෙසැම්බර් 31 වනවිට අය කර ගැනීමට තිබු රුපියල් කෝටි 11කට අධික මුදල අය කර ගැනිම සඳහා ප්‍රමාණවත් පියවර ගෙන නැතැයි ද එම වාර්තාවේ සඳහන් ය.