ගිනි ගත් නැවේ කපිතාන් ඇතුළු තිදෙනෙකුට රටින් පිට වීම වළක්වමින් අධිකරණ නියෝගයක්

COLOMBO (News 1st): එක්ස්ප්‍රස් පර්ල් (X-Press Pearl) නෞකාවේ කපිතාන්වරයාට, ප්‍රධාන ඉංජිනේරුවරයාට සහ අතිරේක ඉංජිනේරුවරයාට රටින් පිටවීම වළක්වමින් කොළඹ අතිරේක මහේස්ත්‍රාත් ප්‍රියන්ත ලියනගේ මහතා අද නියෝගයක් නිකුත් කළේය.

ඒ, නැවේ ගින්න සම්බන්ධයෙන් පරීක්ෂණ මෙහෙයවන අපරාධ පරීක්ෂණ දෙපාර්තමේන්තුව වාර්තාවක් ඉදිරිපත් කරමින් කළ ඉල්ලීමක් සලකා බැලීමෙන් අනතුරුවයි. පසුගියදා කොළඹ වරාය ආසන්නයේදී ගිනි ගැනීමට ලක් වූ එක්ස්ප්‍රස් පර්ල් නෞකාවේ කපිතාන්වරයා ඇතුළු කාර්ය මණ්ඩලයෙන් අපරාධ පරීක්ෂණ දෙපාර්තමේන්තුව ඊයේ(31) ප්‍රකාශ සටහන් කර ගත්තේය. මේ අතර නැවේ අපද්‍රව්‍ය වෙරළට ගොඩ ගැසීම හේතුවෙන් මෙරට වෙරළ තීරයට දැඩි පරිසර හානියක් ද සිදුවිය.