ඉන්දීය නාවික හමුදාවෙන් නාවික හා සාගරික විද්‍යා පීඨයට ඉගෙනුම් ආධාරක

COLOMBO (News 1st) : ඉන්දියානු නාවික හමුදාව විසින් ත්‍රිකුණාමලය නාවික හා සාගරික විද්‍යා පීඨය වෙත ටොපිඩෝ සහ ගෑස් ටර්බයිනයක කැපුම් ආකෘති ඇතුළු ඉගෙනුම් ආධාරක‍ කිහිපයක් ප්‍රදානය කරනු ලැබ තිබේ. 

මෙරට  ඉන්දීය මහ කොමසාරිස් ගෝපාල් බග්ලේ මහතා  ඊයේ නැගෙනහිර නාවික විධානයේ ආඥාපති රියර් අද්මිරාල් වයි. එන්. ජයරත්න වෙත එම ඉගෙනුම් ආධාරක‍ නිල වශයෙන් භාර දී ඇත. නාවික හමුදාව පැවසුවේ, මෙම ඉගෙනුම් ආධාරක නාවික හා සාගරික විද්‍යා පීඨයේ ප්‍රතිසබ්මැරීණ යුද උපක්‍රම, නාවික දැනුම, ජලතරණය, සහ ඉංජිනේරු යන පාසල් තුළ පුහුණුවන නිලධාරීන් සහ නාවිකයින්ගේ පුහුණු කටයුතු සඳහා මනා පිටිවහලක් වනු ඇති බවයි. ශ්‍රී ලංකා නාවික හමුදාව සහ ඉන්දීය නාවික හමුදාව අතර සුහදත්වය වර්ධනය කිරීමක් ලෙස ඉන්දීය නාවික හමුදාධිපති අද්මිරාල් කරන්බීර් සිං 2019 වසරේ නාවික හා සාගරික විද්‍යා පීඨයට පැමිණි අවස්ථාවේ දුන් පොරොන්දුවක් මත මෙම ඉගෙනුම් ආධාරක ලබා දීම සිදු කර තිබේ. ඡායාරූප : - ශ්‍රී ලංකා නාවික හමුදාව