ශිෂ්‍යත්ව දරුවන් පාසල්වලට ඇතුළත් කර ගැනීමේ ක්‍රමයේ වෙනසක් කළේ නැහැ - අධ්‍යාපන අමාත්‍යාංශය

COLOMBO (News 1st) - 5 ශ්‍රේණිය ශිෂ්‍යත්ව විභාගයේ ලකුණු අනුව පාසල්වලට සිසුන් ඇතුළත් කර ගැනීමේ ක්‍රමවේදයේ කිසිදු වෙනසක් සිදු නොකළ බව අධ්‍යාපන අමාත්‍යාංශය පවසයි.

එහි ලේකම් මහාචාර්ය කපිල පෙරේරා මහතා පැවසුවේ, ඒ, ඒ පාසල්වලට ඇතුළත් කර ගන්නා සිසුන් සංඛ්‍යාවේ කිසිදු වෙනසක් සිදු කර නොමැති බවයි. සිසු දරු දැරියන්ට කිසිදු අසාධාරණයක් සිදු වීමට ඉඩ නොතබන බව ද ලේකම්වරයා සඳහන් කළේ ය. ඔහු පැවසුවේ, ශිෂ්‍යත්ව විභාගයෙන් සිසු දරු දැරියන් වැඩි ලකුණු ප්‍රමාණයක් ලබා ගත්ත ද 2017 සිට 2021 දක්වා වසර 05 ක් තුළ පාසල්වලට සිසුන් බඳවා ගැනීමේ ප්‍රමාණය කිසිසේත් ම වෙනස් නොකළ බවයි. එමෙන් ම කිසිදු ආකාරයකින් පාසල්වල පන්ති ප්‍රමාණය හෝ පන්තියකට ඇතුළත් කරගන්නා සිසුන් අඩු කිරීමට තීරණයක් ගෙන නොමැති බවත් පළමු ශ්‍රේණියේ සිට 13 ශ්‍රේණිය දක්වා බාලක, බාලිකා, මිශ්‍ර සහ 6 -13 බාලක, බාලිකා සහ මිශ්‍ර පාසල්වල හෝ එවැනි වෙනසක් සිදු කිරීමට අපේක්ෂා නොකරන බවත් අධ්‍යාපන ලේකම්වරයා අවධාරණය කළේ ය. එමෙන්ම අභියාචනා ඉදිරිපත් කිරීම සඳහා පෙබරවාරි 15 වැනි දා සිට මසක කාලයක් ලබාදෙන බව අධ්‍යාපන ලේකම් මහාචාර්ය කපිල පෙරේරා මහතා ප්‍රකාශ කළේ ය.