පොලිස් ආරක්ෂාව ඉල්ලා හරීන්ගෙන් ලිපියක්

COLOMBO (News 1st ) - අතිගරු ජනාධිපතිතුමා ඊයේ(09) කළ ප්‍රකාශයකට අදාළව පාර්ලිමේන්තු මන්ත්‍රී හරීන් ප්‍රනාන්දු මහතා පොලිස්පති සී.ඩී. වික්‍රමරත්න මහතාට ලිපියක් යවා තිබේ. ජනාධිපතිවරයා කළ ප්‍රකාශයට අදාළ වීඩියෝ පටයක් සහ පිටපතක් ද අමුණා හරීන් ප්‍රනාන්දු මන්ත්‍රීවරයා මෙම ලිපිය පොලිස්පතිවරයාට යොමුකර තිබේ. මන්ත්‍රීවරයා පෙන්වා දෙන්නේ, දේශද්‍රෝහී, ජන සංහාරක, ත්‍රස්තවාදී කෲර පුද්ගලයෙක් සහ පාර්ලිමේන්තුවේ කතා කිරීමේ නිදහස සඳහා තම මූලික අයිතිය ක්‍රියාත්මක කරන ව්‍යවස්ථාදායක මහජන නියෝජිතයෙකු අතර වෙනස හඳුනා ගැනීමට ජනාධිපතිවරයා අසමත් වී ඇති බවයි. ඔහු තම රාජකාරියේ දිගටම අසමත් වන තාක්කල්, සිය ජීවිතයට කුමන අවදානමක් තිබුණත්, ඔහු අකමැති වුවත් සත්‍ය නොකඩවා පැවසීමෙන් තම යුතුකම හා වගකීම ඉටු කරන බව හරීන් ප්‍රනාන්දු මහතා පොලිස්පතිවරයාට යැවූ ලිපියේ සඳහන් කර තිබේ. උපුටා ගැනීම -- මම කිසිදාක ත්‍රස්තවාදීන් සමග සම්බන්ධ වී නැති බව ඔහුට සිහිපත් කර දිය යුතුය. දෙමළ ජනතාව ඡන්දය දීම වැළැක්වීම සඳහා මම කිසි විටෙක ත්‍රස්තවාදීන්ට අල්ලස් දී නැත. මෙතෙක් ජීවත් වූ කිසිම මිනිසෙකුට වඩා පොලිස් නිලධාරීන් පිරිසක් ඝාතනය කළ කරුණා අම්මාන් මම වැළඳගෙන නැත. සියල්ලටත් වඩා, මම, සෑම විටම, ශ්‍රී ලංකාවේ පුරවැසියෙක් මිස වෙනත් රටක පුරවැසියෙක් නොවෙමි.! ජනාධිපතිවරයා පැහැදිලිවම කියා සිටින්නේ මා ඔහුට අකමැති දේවල් නොකඩවා පැවසුවහොත් මාව “බල්ලෙකු මෙන් මරා දැමීමට” ඔහුට හැකියාව ඇති බවය. ආරක්ෂක අංශවල සේනාධිනායකයා සහ ආරක්ෂක ඇමතිවරයා වන ජනාධිපති නන්දසේන ගෝඨාභය රාජපක්ෂ විසින් කරන ලද තර්ජනයේ බරපතල ස්වභාවය සැලකිල්ලට ගෙන, ඔහු මට හානියක් කිරීමට හැකියාවක් ඇති බව ඇඟවූ විට ඔහු ගැන තවදුරටත් සැක කිරීමට මට හේතුවක් නැත. එය නිෂ්චිතය! මම ඔහුගේ මුල් නම සඳහන් කළ පමණින් ජනාධිපතිවරයා මෙතරම් කලබලයට පත්වීම ගැන විමතියට පත් වෙමි.-- උපුටා ගැනීම අවසන් ඉතිහාසයේ සිට ජනාධිපතිවරුන් දිගු කලක් තිස්සේ ඔවුන්ගේ නම් හෝ මුලකුරු වලින් හඳුන්වා ඇතැයි සිහිපත් කරන හරීන් ප්‍රනාන්දු මන්ත්‍රීවරයා “ජේ ආර්”, “ප්‍රේමදාස”, “ඩී බී”, “චන්ද්‍රිකා”, “මහින්ද” හෝ “සිරිසේන” යන නම් භාවිතා කිරීම නිසා ඔවුන් කිසිවෙක්, කිසිවෙකුට මරණීය තර්ජනය කර නැතැයි පෙන්වා දී තිබේ. ඔහු පොලිස්පතිවරයාට යැවූ ලිපියේ සඳහන් වන්නේ ජනාධිපතිවරයා නිශ්චිතව ඔප්පු නොකරන්නේ නම්, මහා සංඝරත්නය ඔහුට ප්‍රචණ්ඩත්වයට යොමු වන ලෙස සැබවින්ම උපදෙස් දී ඇතැයි විශ්වාස කිරීම දුෂ්කර බවයි. ජනාධිපතිවරයා, ආරක්ෂක ලේකම්ව සිටියදී විවේචනය කළ බොහෝ මාධ්‍යවේදීන්, ක්‍රියාකාරීන් සහ පාර්ලිමේන්තු මන්ත්‍රීවරුන් අතුරුදහන් වී හෝ ඝාතනයට ලක්ව ඇති බව තමන් දන්නා බව සිහිපත් කරන ඔහු එම ප්‍රහාරයන්ට පෙර දේශපාලනඥයින් විසින් ආරම්භ කරන ලද ව්‍යාජ තර්ජන හෝ නිෂ්ඵල නඩු පැවරීම් සිදුවූ බව ද සිහිපත් කර තිබේ. මන්ත්‍රීවරයා පොලිස්පතිවරයාට දන්වා ඇත්තේ ත්‍රස්තවාදියෙකු මෙන් ඝාතනය කරනු ඇතැයි බියෙන් තොරව තමා කැමති දේ පැවසීම මූලික අයිතියක් බවයි. උපුටා ගැනීම ---පොලිස්පතිතුමනි, ඔබ ශ්‍රී ලංකා ජනරජයේ පොලිස්පතිවරයා මිස නන්දසේන ගෝඨාභය රාජපක්ෂ ජනාධිපතිවරයාගේ පෞද්ගලික සේවකයා නොවේ. පාර්ලිමේන්තු මන්ත්‍රීවරුන්ගේ ජීවිතය හා නිදහස ආරක්ෂා කිරීම මම ඔබෙන් ඉල්ලා සිටින පෞද්ගලික අනුග්‍රහයක් නොව, ඔබ දිවුරුම් දී ඇති ජනරජයේ ආණ්ඩුක්‍රම ව්‍යවස්ථාව ආරක්ෂා කිරීම සඳහා ඔබට ඇති වගකීම සහ යුතුකමයි--- උපුටා ගැනීම අවසන් නිෂ්ශබ්ද වීම ප්‍රතික්ෂේප කරන බැවින්, තමා මරණයට පත් වුවහොත්, මෙතෙක් එවැනි තර්ජනයක් කර ඇති එකම මිනිසාගේ අභිමතය පරිදි එය සිදුවනු ඇතැයි සිතන බව මන්ත්‍රීවරයා පොලිස්පතිවරයාට දැනුම් දී තිබේ. හරීන් ප්‍රනාන්දු මහතා සිය ලිපිය අවසානයේ සඳහන් කර ඇත්තේ එහි පිටපත් කතානායකවරයාට, නීතිපතිවරයාට, කොළඹ විදේශ තානාපති මණ්ඩල ප්‍රධානීන්ට සහ අදහස් හා අදහස් ප්‍රකාශ කිරීමේ නිදහස සහ බාහිර විනිශ්චය, සාරාංශය හෝ අත්තනෝමතික ඝාතන පිළිබඳ එක්සත් ජාතීන්ගේ විශේෂ වාර්තාකරුවන්ටද යොමු කළ බවයි.