UNP ජාතික ලැයිස්තු මන්ත්‍රී ධුරය රනිල්ට ද?

COLOMBO (News 1st) : එක්සත් ජාතික පක්ෂයට හිමි වූ ජාතික ලැයිස්තු මන්ත්‍රී ධුරය සඳහා රනිල් වික්‍රමසිංහ මහතා පත් කිරීමට සිරිකොත පක්ෂ මූලස්ථානයට අද පැමිණි පක්ෂ නියෝජිතයින් ලිඛිත ඉල්ලීමක් සිදු කර තිබේ. අර්ජුන රණතුංග මහතා පැවසුවේ, මේ මොහො‌තේ පක්ෂයට වඩා දැක්මක් සහිත පුද්ගලයෙකු පාර්ලිමේන්තුවේ සිටීම වැදගත් බැවින් සියලු දෙනා එක්ව ඔහුගෙන් ලිඛිතව මෙම ඉල්ලීම සිදු කළ බවයි. මාධ්‍යට අදහස් පළ කරමින් අර්ජුන රණතුංග මහතා වැඩිදුරටත් පැවසුවේ, ලෝකයම මුහුණදී සිටින වසංගත තත්ත්වයත් සමග ජීවත් වන මොහොතක රටේ ආර්ථිකය ගොඩ ගැනීමට හොඳම මොළකරු රනිල් වික්‍රමසිංහ මහතා බවයි. කෙසේ වෙතත් තමා ඇතුළු සාමාජිකයින් කළ ඉල්ලීමට පක්ෂ නායකවරයාගේ එතරම් කැමැත්තක් නොදැක්වූ බව ද ඔහු සඳහන් කළේ ය. ලබන සතිය වන විට තමා ඇතුළු කණ්ඩායමේ ඉල්ලීම සම්බන්ධයෙන් අවසන් තීරණය ලැබෙනු ඇතැයි, ඔහු විශ්වාසය පළ කළේ ය.