ප්‍රවීණ කලා ශිල්පිනි අනුලා බුලත්සිංහල අභාවප්‍රාප්ත වෙයි

COLOMBO (News 1st) : ප්‍රවීණ කලා ශිල්පි අනුලා බුලත්සිංහල මහත්මිය අද අභාවප්ප්‍රාප්ත විය. ඒ ජයවර්ධනපුර රෝහලේ ප්‍රතිකාර ලබමින් සිටියදීයි. අභාවප්ප්‍රාප්ත වන විට ඇගේ වයස අවුරුදු 73කි. රතු හැට්ටකාරි, තාරාවෝ ඉගිළෙති, මධුර ජවනිකා, කු‍වේණි, මහාසාර, ලෙඩෙක් නැති ලෙඩක්, චරිත දෙකක් වැනි වේදිකා නාට්‍යවලදී ද, නිල් දිය යහන, ගෝල් වැනි සිනමාපවලට ඇය සිය රංගන දායකත්වය ලබා දී තිබේ. මෑතකදී අසන්ධිමිත්තා සිනමාපටයට ද ඈ රංගනයෙන් දායක වූවා ය. දී කිරි දී කිරි, නෙයිනගේ සූදුව, රඟහල දැන් ඇත අඬ ඇඳුරේ, පන්සල පාමුල, බුදුන් වඳින මේ දෑතින්, සුදු ඔසරිය ඇඳලා ගීතවලට ඇය සිය ගායන දායකත්වය ලබා දුන්නා ය. මෙවර රාජ්‍ය නාට්‍ය උලෙළේදී ජීවිතයේ එක්වරක් පමණක් පිදෙන නාට්‍යකීර්ති සම්මානය ද අනුලා බුලත්සිංහල මහත්මියට පිරිනැමී ය. අභාවප්ප්‍රාප්ත අනුලා බුලත්සිංහල මහත්මියගේ දේහය පිළිබඳ අවසන් කටයුතු සිදුකෙරෙන දිනය පසුවට දැනු ම්දෙන බව පවුලේ ඥාතීහු ප්‍රකාශ කළහ.