මත්ද්‍රව්‍ය ජාවාරම්කරුවන්ගේ දේපොළ රාජසන්තක කිරීම ගැන සොයා බලන්නැයි අගමැතිගෙන් උපදෙස්

COLOMBO (News 1st) - මත්ද්‍රව්‍ය ජාවාරම්කරුවන්ගේ දේපොළ රාජසන්තක කිරීම සම්බන්ධයෙන් සොයා බලන්නැයි අග්‍රාමාත්‍ය මහින්ද රාජපක්ෂ මහතා නීතිපතිවරයාට උපදෙස් දී තිබේ.

ඒ, ඊයේ පස්වරුවේ ඒ සම්බන්ධයෙන් පැවති සාකච්ඡාවකදීය. ජාවාරම්කරුවන්ට අයත්, දේපොළ අන් අයට පැවරීම හෝ විකිණීම තහනම් කිරීමට, කඩිනම් සුදුසු වැඩපිළිවෙළක් සකස් කරන්නැයි ද අග්‍රාමාත්‍යවරයා උපදෙස් දුන් බව අග්‍රාමාත්‍ය කාර්යාලය පැවසුවේ ය. ඊට අදාළ අධිකරණ නියෝග කඩිනමින් ලබා ගෙන එම කටයුතු විධිමත් කිරීමේ අවශ්‍යතාව ද අග්‍රාමාත්‍යවරයා එහිදී පෙන්වා දී තිබේ. අග්‍රාමාත්‍ය කාර්යාලය සඳහන් කළේ, දේපොළ රාජසන්තක කිරීමේ ක්‍රියාවලියට නීති සංශෝධනයක් අවශ්‍ය වන්නේ නම් එම කටයුතු ද කඩිනම් කරන්නැයි, අග්‍රාමාත්‍යවරයා එහිදී උපදෙස් දුන් බවයි. මේ වනවිට මත්ද්‍රව්‍ය ජාවාරම්කරුවන්ගේ රාජසන්තක කිරීමට නියමිත දේපොළ අතර රුපියල් මිලියන 749 ක ඉඩකඩම් පවතින බව පොලීසිය පැවසීය. පොලීසිය ප්‍රකාශ කළේ, ඔවුන්ට අයත් වාහන 89 ක් ද පවතින බවයි. සැකකරුවන් අයත් මුදල් ප්‍රමාණය රුපියල් බිලියන 11 කට ආසන්න වේ.