අගමැතිගෙන් නවක මන්ත්‍රීන්ට අවවාදයක්

COLOMBO (News 1st) : ජනතාව අපේක්ෂා කරන ව්‍යවස්ථා වෙනසට පෞද්ගලික න්‍යායපත්‍ර පසෙකලා එක්වන්නැයි, අග්‍රාමාත්‍ය මහින්ද රාජපක්ෂ මහතා අද නවක පාර්ලිමේන්තු මන්ත්‍රීවරුන්ට ඇරයුම් කළේ ය. අග්‍රාමාත්‍යවරයා මේ ඇරයුම් කළේ, අද පාර්ලිමේන්තුවේදී ආරම්භවූ වැඩ මුලුවක් අමතමිනි. මෙවර පාර්ලිමේන්තුවට තේරී පත්වූ නවක මන්ත්‍රීවරුන් වෙනුවෙන් මෙම වැඩ මුළුව පැවැත්වේ. පාර්ලිමේන්තුව තුළ අනුගමනය කළ යුතු ක්‍රියාපටිපාටීන් සම්බන්ධයෙන් එහිදී පිරිස දැනුවත් කරන අතර වැඩමුළුවට එක්වූ නවක මන්ත්‍රීවරුන් ගනන 81 කි. මහ මැතිවරණයේදී ජනතා ඡන්දයෙන් පළමු වරට පාර්ලිමේන්තුවට තේරී පත්වු මන්ත්‍රීවරුන් ගනන 65 ක් වන අතර ජාතික ලැයිස්තුවෙන් 16 දෙනෙකු මෙවර පාර්ලිමේන්තුවට පත්විය. අනතුරුව අදහස් දැක්වූ අග්‍රාමාත්‍ය මහින්ද රාජපක්ෂ මහතා නවක මන්ත්‍රීවරුන්ට අවවාදයක් කළේ ය. ව්‍යවස්ථා වෙනසක් පිළිඳව ජනතාවගේ අපේක්ෂා ඉටු කිරීමට කැපවීමේ අවශ්‍යතාවය ද අග්‍රාමාත්‍ය මහින්ද රාජපක්ෂ මහතා මෙහිදී අවධාරණය කළේ ය. වැඩමුළුව හෙටත් පාර්ලිමේන්තු සංකීර්ණයේදී පැවැත්වීමට නියමිතයි.