වැඩබලන චීන තානාපති මහින්ද රාජපක්ෂ හමුවෙයි

COLOMBO (News 1st) : අග්‍රාමාත්‍ය මහින්ද රාජපක්ෂ මහතාට චීනයේ කොමියුනිට්ස් පක්ෂයේ සුබ පැතුම් හිමිව තිබේ. ඒ චීනයේ මෙරට වැඩ බලන තානාපතිවරයා අග්‍රාමාත්‍යවරයා අද පස්වරුවේ හමුවු අවස්ථාවේදීයි. මෙම හමුව අරලියගහ මන්දිරයේදී පැවැත්විය. එහිදී චීනයේ මෙරට වැඩ බලන තානාපතිවරයා අග්‍රාමාත්‍යවරයාට පවසා ඇත්තේ ශ්‍රී ලංකාව හා චීනය අතර නව අවස්ථා උදාකර ගැනීම සඳහා චීනයේ කොමියුනිට්ස් පක්ෂය ශ්‍රී ලංකා පොදුජන පෙරමුණ සමග එක්ව කටයුතු කිරීමට සුදානමින් සිටින බවයි. ඉදිරි සංවර්ධන කටයුතු වෙනුවෙන් ද්වීපාර්ශවික සබඳතා පුළුල් කර ගැනීම පිළිබඳව ද මෙහිදී සාකච්ඡා වී තිබේ. දැනට ක්‍රියාත්මක ව්‍යාපෘතිවලට අමතරව වරාය නගරයේ වැඩ කඩිනම් කරන ලෙසත් පානීය ජලය හා වාරිමාර්ග ව්‍යාපෘති එක්ව ක්‍රියාත්මක කිරීම සම්බන්ධයෙන් සලකා බලන ලෙසත් අග්‍රාමාත්‍ය රාජපක්ෂ මහතා මෙහිදී චීනයේ ශ්‍රී ලංකා වැඩබලන තානාපතිවරයාගෙන් ඉල්ලීමක් කර තිබේ.