මරණ දඬුවමේ තහනම් නියෝගය ඔක්තෝම්බර් 15 වැනිදා දක්වා දීර්ඝ කෙරේ

by Staff writer 29-05-2020 | 3:42 PM

COLOMBO (News 1st) : හෙරොයින් ජාවාරම්කරුවන් පිරිසකට මරණ දඬුවම ලබාදීමට හිටපු ජනාධිපති මෛත්‍රීපාල සිරිසේන මහතා ගෙන තිබු තීරණය ක්‍රියාත්මක කිරීම අත්හිටුවමින් නිකුත් කර තිබූ තහනම් නියෝගය ලබන ඔක්තෝම්බර් 15 වැනිදා දක්වා දීර්ඝ කර තිබේ.

අප අධිකරණ වාර්තාකරු ප්‍රකාශ කළේ, ශ්‍රේෂ්ඨාධිකරණය විසින් අද මෙම නියෝග කළ බවයි. ලෝක මත්ද්‍රව්‍ය නිවාරණ දිනයේ පැවති රැස්වීමක් අමතමින් හිටපු ජනාධිපති මෛත්‍රීපාල සිරිසේන මහතා විසින් හෙරොයින් ජාවාරම්වලට සම්බන්ධ ප්‍රධාන පෙලේ පුද්ගලයින් 4 දෙනෙකු එල්ලා මැරීමට තමන් අත්සන් කරන බව ප්‍රකාශ කළේ ය. එම ප්‍රකාශය අනුව බන්ධනාගාරගත කර සිටින මරණ දඬුවම නියම වී සිටින හෙරොයින් ජාවාරම්කරුවන් කිසිවෙකුත් එල්ලා මැරීම වළක්වන්නැයි ඉල්ලා විකල්ප ප්‍රතිපත්ති කේන්ද්‍රය සහ මරණීය දණ්ඩනය නියම වී ඇති පිරිසක් ශ්‍රේෂ්ඨාධිකරණයට පෙත්සම් 12 ක් ගොනු කරනු ලැබුවේ ය. ඒ මෙම පෙත්සම් අද මුර්දු ප්‍රනාන්දු , එස්.තුරෙයි රාජා සහ යසන්ත කෝදාගොඩ යන ත්‍රිපුද්ගල විනිසුරු මඩුල්ල හමුවේ කැඳවු අවස්ථාවේ දී ය. එම පෙත්සම් වැඩිදුර සලකා බැලීම සඳහා ලබන ඔක්තොම්බර් 14 වැනිදා යළි කැඳවීමට ද විනිසුරු මඩුල්ල එහිදී නියෝග කළේ ය.