හමුදා කැබ් රථයක ගැටීමෙන් යතුරු පැදියක ගමන් ගත් පොලිස් සැරයන්වරයෙකු මරුට

COLOMBO (News 1st) : හමුදා කැබ් රථයක ගැටීමෙන් යතුරු පැදියක ගමන් ගත් පොලිස් සැරයන්වරයෙකු නාරම්මලදී මිය ගියේ ය.

අප වාර්තාකරු සඳහන් කළේ, ඊයේ රාත්‍රී 7.00 ට පමණ මෙම අනතුර සිදුව ඇති බවය. පුදුකුඩිඉරිප්පු හමුදා කඳවුරට අයත් කැබ් රථයක් සහ නාරම්මල පොලිස් රථවාහන අංශයේ සේවය කරන සැරයන්වරයෙකුගේ යතුරු පැදියක් එකිනෙක ගැටීමෙන් මෙම අනතුර සිදුවිය. පොලීසිය පැවසුවේ අනතුරෙන් තුවාල ලැබූ සැරයන්වරයා නාරම්මල දිසා රෝහලට ඇතුළත් කිරීමෙන් අනතුරුව මියගොස් ඇති බවයි. කුරුණැගල, බෝයගනේ ප්‍රදේයේ පදිංචි සිටි 47 හැවිරිදි ඔහු එක්දරු පියෙකු බවත්, නාරම්මල පොලීසියට අනුයුක්තව වසර 8 ක කාලයක් සේවය කර ඇති බවත් අප වාර්තාකරු සඳහන් කළේ ය. අනතුරෙන් යතුරු පැදියට දැඩි හානි සිදුව ඇති අතර කැබ් රථයෙහි පැමිණි කිසිවෙකුට අනතුරක් වී නොමැත.