ජංගම වෙළෙඳුන්ට අනිවාර්යය උපදෙස් මාලාවක් නිකුත් කෙරේ

COLOMBO (News 1st) - වෙළෙඳාම් කටයුතු සෞඛ්‍ය ආරක්ෂිතව සිදු නොකිරීම මත කොරෝනා වෛරසය සාමාන්‍ය ජනතාව වෙත ව්‍යාප්තවීමේ අවදානමක් මතුව ඇතැයි පොලීසිය පවසයි.

පොලිස් මූලස්ථානය නිවේදනය කළේ, එම තත්ත්වය සැළකිල්ලට ගෙන මාර්ගගත ක්‍රමය යටතේ නිවසින් නිවසට ගොස් මාළු, එළවළු, පළතුරු හා බේකරි නිෂ්පාදන ඇතුළු වෙනත් ආහාර ද්‍රව්‍ය අලෙවි කිරීම සඳහා අවසර ලබාදී ඇති සියලුම වෙළෙඳුන් සහ ආයතන තම ජංගම වෙළෙඳාම් කටයුතු සිදු කිරීමේදී පහත සඳහන් උපදෙස් අනුගමනය කළ යුතු බවයි. පිරිසිදු ඇඳුමින් සැරසී සිටීම, පා වැසෙන පරිදි සපත්තු හෝ සුදුසු පාවහන් පැළඳීම, වෙළෙඳාම් කටයුතු සිදු කරන අවස්ථාවේ මුඛ ආවරණ සහ අත් ආවරණ පැළඳීම, විෂබීජානුහරණ දියර භාවිත කිරීම, බේකරි නිෂ්පාදන, පිසූ ආහාර ආදිය අලෙවි කරන්නේ නම් ඒවා අතින් ඇල්ලීම නොකර පාරිභෝගිකයින් වෙත ලබාදීම සඳහා අවශ්‍ය උපකරණ භාවිත කිරීම, ආහාර සහ භාණ්ඩ අලෙවි කිරීමේදී කඩදාසි හෝ වෙනත් ආවරණ තුළට දමා අලෙවි කිරීම අනුගමනය කළ යුතු උපදෙස් අතර වේ. පොලීසිය පැවසුවේ, මුදල් ස්පර්ෂ කිරීමෙන් පසු එම අතින්ම ආහාර ද්‍රව්‍ය, භාණ්ඩ හෝ ආවරණ ස්පර්ශ කිරීමෙන් වැළකීම, ආහාර මිලදී ගැනීම සඳහා පැමිණෙන මහජනතාවට ආහාර ඇල්ලීමට ඉඩ නොදීම, මහජනතාව ආහාර හා භාණ්ඩ අලෙවි කරන වාහන අසළ රැඳී සීටීමේදී මීටරයක පරතරය පවත්වාගෙන යාම ද ආහාර ද්‍රව්‍ය හා භාණ්ඩ අලෙවි කරන ජංගම වෙළෙඳුන් අනුගමනය කළ යුතු උපදෙස් අතර වන බවයි. මාර්ගගත ක්‍රමය යටතේ ජංගම වෙළෙඳාමේ යෙදීම සඳහා නිසි අවසරයක් ලබාගෙන ඇති පුද්ගලයින් ඉහත උපදෙස් අනුගමනය කිරීම අනිවාර්යය වන අතර අද සිට ඉහත උපදෙස් පරිදි කටයුතු නොකරන වෙළෙඳුන්ගේ ඇඳිරි නීති බලපත්‍ර අවලංගු කිරීමට කටයුතු කරන බව ද පොලීසිය සඳහන් කළේ ය.