ඉතාලිය හා දකුණු කොරියාවේ සිට පැමිණි පුද්ගලයින් 2000 ක් නිරෝධායනයට

COLOMBO (News 1st) - කොරෝනා වෛරසය සීඝ්‍රයෙන් ව්‍යාප්ත වන ඉතාලියෙන් හා දකුණු කොරියාවෙන් පැමිණි 2000 කට අධික පිරිසක් මේ වනවිට නිරෝධායනයට ලක් කරමින් සිටින බව සෞඛ්‍ය අමාත්‍යාංශය පවසයි.

එහි ප්‍රධාන වසංගත රෝග විද්‍යාඥ විශේෂඥ වෛද්‍ය සුදත් සමරවීර මහතා සඳහන් කළේ, ඔවුන් රැඳී සිටින ප්‍රදේශවල සිටින මහජන සෞඛ්‍ය පරීක්ෂකවරුන් මාර්ගයෙන් මෙම කටයුතු සිදු කරන බවයි. මේ අතර ඉතාලියෙන් හා දකුණු කොරියාවෙන් පැමිණෙන සියලු පුද්ගලයින් වෙනම මධ්‍යස්ථානවල රඳවා නිරෝධායනය කිරීමට ද තීරණය කර ඇති බව ඔහු සඳහන් කළේ ය. විශේෂඥ වෛද්‍ය සුදත් සමරවීර මහතා පැවසුවේ, ඒ සඳහා මධ්‍යස්ථාන කිහිපයක් කඩිනමින් සූදානම් කරන බවයි. කොරෝනා ආසානදනය වූ බවට සැකපිට පුද්ගලයින් 19 දෙනෙකු මේ වනවිට අංගොඩ බෝවන රෝග විද්‍යායතනය ඇතුළු රෝහල් කිහිපයක ප්‍රතිකාර ලබන බව ද ඔහු පැවසීය. වෛද්‍ය සුදත් සමරවීර මහතා සඳහන් කළේ, ඔවුන්ගේ සාම්පල මේ වනවිට පරීක්ෂණ සඳහා යොමු කර ඇති බවයි.