චීන මහජන සමූහාණ්ඩුව 70 වන සංවත්සරය සමරයි

COLOMBO (News 1st) : චීන මහජන සමූහාණ්ඩුව පිහිටුවීමේ 70 වැනි සංවත්සරික උත්සවය අද බෙයිජිංහි ටියැංඅන්මෙන් චතුරශ්‍රයේදී අභිමානවත් ලෙස පැවැත්විණ. සංවත්සරික උත්සවය සමගින් උද්යෝගවත් හමුදා උත්තාමාචාරයක් ද පැවති අතර එය චීන හමුදාව ප්‍රතිසංස්කරණයෙන් පසු පැවති ප්‍රථම හමුදා උත්තමාචාරයයි. සංවත්සරික උත්සවය අමතමින් චීන ජනාධිපති ෂී ජින් පිං මහතා පැවසුවේ, වර්තමානයේ සමාජවාදී චීනය නැගෙනහිර ලෝකයේ ස්ථීර ලෙස නැඟී සිටින බවයි. කිසිදු බලවේගයකට චීනයේ ස්ථානය වෙනස් කළ නොහැකි බවත් කිසිදු බලවේගයකට චීන ජනතාවගේ ඉදිරි ගමනට බාධා එල්ල කළ නොහැකි බවත් හෙතෙම ප්‍රකාශ කළේ ය. ජනතාවගේ යහපත් ජීවිතය සඳහා වූ අපේක්ෂාව ‍අඛණ්ඩව සපුරා දෙමින් අලුත් ‍ඓතිහාසික විශිෂ්ටත්වය නිර්මාණය කිරීමට චීනය දායක වන බව පැවසූ ජනාධිපතිවරයා අවධාරණය කර සිටියේ, චීන කොමියුනිස්ට් පක්ෂයේ මූලික න්‍යාය, මූලික ක්‍රියාවලිය, මූලික උපායමාර්ගය අංග සම්පූර්ණයෙන් ම ක්‍රියාත්මක කරන ලෙසයි. ඉදිරියට ගමන් කිරීමේදී 'සාමකාමී එක්සත්භාවය, එක් රටක්, ක්‍රම දෙකක්' යන ක්‍රියාවලියට චීනය අනුගමනය කළ යුතු බව ෂී ජින් පිං මහතා එහිදී අවධාරණය කළේ ය. විශේෂ පරිපාලන කාලප වන හොංකොං සහ මැකෞව්හි දීර්ඝ කාලීන සමෘද්ධිය හා ස්ථාවරත්වය පවත්වා ගෙන තායිවාන සමුද්‍ර සන්ධි දෙපස සබඳතා හා සාමකාමී සංවර්ධනය ඉදිරියට ගෙන යා යුතු බව ද හෙතෙම සඳහන් කළේ ය. ලෝකයේ ඒ ඒ රටවල ජනතාව සමඟ එක්ව පොදු ඉරණම සහිත මානව ප්‍රජාව පොදුවේ බිහි කිරීම සඳහා දායක විය යුතු යැයි ද ෂී ජින් පිං මහතා චීන මහජන සමූහාණ්ඩුව පිහිටුවීමේ 70 වැනි සංවත්සර සැමරුම් සමුළුවේදී පෙන්වා දුන්නේ ය.