අමල් හා නදීමාල් ඇතුළු පිරිස යළි රක්ෂිත බන්ධනාගාරගත කෙරේ

COLOMBO (News 1st) - ඩුබායිහි අත්අඩංගුවේ සිටින ගායන ශිල්පී අමල් පෙරේරා හා ඔහුගේ පුත් ගායන ශිල්පී නදීමාල් පෙරේරා ඇතුළු පිරිස තවත් මාසයක කාලයක් රක්ෂිත බන්ධනාගාරගත කර තිබේ. ඒ, ඩුබායි අධිකරණයට ඉදිරිපත් කිරීමෙන් අනතුරුව ය. ඔවුන් වෙනුවෙන් පෙනී සිටින නීතිඥ ශාබ්දික වෙල්ලප්පිලි මහතා සඳහන් කළේ, අමල් පෙරේරා හා නදීමාල් පෙරේරා මත්ද්‍රව්‍ය භාවිත කර ඇත්දැයි තහවුරු කර ගැනීම සඳහා එරට පොලීසිය කැඳවූ වාර්තා මෙතෙක් ලැබී නොමැති බව ය. අමල් හා නදිමාල් දෙදෙනා පසුගිය මස 5 වන දා දින ඩුබායිහි හෝටලයකදී අත්අඩංගුවට පත් වූයේ, පාතාල කල්ලි නායක මාකදුරේ මධුෂ් ඇතුළු පිරිසක් සමග උපන් දින සාදයකට සහභාගී වෙමින් සිටියදී ය. එහිදී අත්අඩංගුවට ගත් පිරිස 31කි. ඒ අතර මත්ද්‍රව්‍ය ජාවාරමට හා අපරාධ රැසකට සම්බන්ධ සැකකරුවන් පිරිසක් ද වේ.