කළුතර ප්‍රාදේශීය සභාවේ හිටපු සභාපති ලක්ෂ්මන් විදානපතිරණට වසර 5ක සිර දඬුවමක්

COLOMBO (News 1st) - අල්ලස් චෝදනාවකට වරදකරු වූ කළුතර ප්‍රාදේශීය සභාවේ හිටපු සභාපති ලක්ෂ්මන් විදානපතිරණ නමැත්තාට කොළඹ මහාධිකරණය අද වසර 5ක සිර දඬුවමක් නියම කළේ ය. ඒ, 2012 වසරේ කළුතර ප්‍රදේශයේ ඉඩමක් මැදින් පිවිසුම් මාර්ගයක් සකස් කිරීම සඳහා පුද්ගලයෙකුගෙන් රුපියල් ලක්ෂ 30ක මුදලක් ලබා ගත් බවට විත්තිකරුට එරෙහිව අල්ලස් කොමිසම පැවරූ නඩුවක තීන්දුව ප්‍රකාශයට පත් කරමිනි. කොළඹ මහාධිකරණ විනිසුරු ගිහාන් කුලතුංග මහතා නියෝග කළේ, සිර දඬුවමට අමතරව අල්ලස් වශයෙන් ලබා ගත් රුපියල් ලක්ෂ 30ක මුදල දණ්ඩනයක් ලෙස අය කර ගන්නා ලෙස ය. මීට අමතරව රුපියල් ලක්ෂ 20ක් පැමිණිලිකරුට ගෙවන ලෙස නියෝග කළ විනිසුරුවරයා එක් වරදකට රුපියල් 5000 බැගින් චෝදනා 4ක් සඳහා රුපියල් 20000ක දඩයක් ද විත්තිකරුට පනවනු ලැබුවේ ය.