රේගු නිලධාරීන්ගේ වෘත්තිය ක්‍රියාමාර්ගය අවසන් කෙරේ

COLOMBO (News 1st) - රේගු නිලධාරීන්ගේ අකුරට වැඩ කිරීමේ වෘත්තිය ක්‍රියාමාර්ගය අවසන් කර තිබේ. ඔවුන් මෙලෙස වෘත්තිය ක්‍රියාමාර්ගයක නිරත වුණේ, රේගු අධ්‍යක්ෂ ජනරාල් ලෙස කටයුතු කළ පී.එස්.එම්. චාල්ස් මහත්මිය එම ධූරයෙන් ඉවත් කිරීමට විරෝධය පළ කරමිනි. සාධාරණ හේතු නොදක්වා ඇය එම තනතුරෙන් ඉවත් කර ඇති බවට වෘත්තීය සමිති චෝදනා කරයි. කෙසේ වෙතත් පී.එස්.එම්. චාල්ස් මහත්මිය මාස තුනක කාලයක් සඳහා යළි එම තනතුරේ පිහිටුවා තිබේ. ඒ, අද පස්වරුවේ පැවති කැබිනට් හමුවේ එකඟතාව මතයි. මේ අතර, කැබිනට් මණ්ඩලයේ තීරණය නිල වශයෙන් දැනුම් දීමත් සමග සිය වෘත්තිය සමිති ක්‍රියාමාර්ගය අත්හිටවූ බව රේගු මාණ්ඩලික නිලධාරීන්ගේ සංගමය පවසයි. එහි ලේකම් විපුල මිනුවන්පිටිය මහතා ප්‍රකාශ කළේ, ඒ අනුව සිය රාජකාරී සමාන්‍ය පරිදි ආරම්භ කරන බව ය.