මාකදුරේ මධුෂ් ජනප්‍රිය ගායකයෙකු ද සමග ඩුබායිහිදී අත්අඩංගුවට

COLOMBO (News 1st) : ප්‍රබල මත්ද්‍රව්‍ය ජාවාරම්කරුවෙකු සහ පාතාල නායකයෙකු බව කියන මාකදුරේ මධුෂ් ඇතුළු සැකකරුවන් 25 දෙනෙකු මත්ද්‍රව්‍ය සමග ඩුබායිහි හෝටලයකදී අත්අඩංගුවට ගෙන තිබේ. පොලීසිය පවසන්නේ, අත්අඩංගුවට ගත් පිරිස අතර ප්‍රමුඛ පෙළේ මත්ද්‍රව්‍ය ජාවාරම්කරුවන් 5 දෙනෙකු ද සිටින බවයි. ඉන් සිව් දෙනෙකු හඳුනාගෙන ඇතැයි ද පොලීසිය පැවසී ය. අත්අඩංගුවට ගත් පිරිස අතර, කන්චිපානි ඉම්රාන්, කෙසෙල්වත්තේ දිනුක ඇතුළු පිරිසක් සිටින බව පොලිසිය වැඩිදුරටත් ප්‍රකාශ කළේ ය. අත්අඩංගුවට ගත් සෙසු පිරිස අතර මෙරට ජනප්‍රිය ගායන ශිල්පියෙකු වන අමල් පෙරේරා මහතා සහ ඔහුගේ පුත්‍රයා සහ තවත් රංගන ශිල්පියෙකු ද වේ. මාකදුරේ මධුෂ්ගේ දරුවෙකුගේ උපන් දින සාදයක් සඳහා මෙම 25 දෙනා සහභාගී වී ඇතැයි පොලීසිය ප්‍රකාශ කළේ ය.