අරාබිකරයේ දේව මෙහෙයක් පැවැත්වූ පළමු පාප්තුමන් ලෙස ශුද්ධෝත්තම ෆ්‍රැන්සිස් හිමිපාණන් ඉතිහාසයට එක්වෙයි

(News 1st) - අරාබිකරයේ දේව මෙහෙයක් පැවැත්වූ පළමු පාප්තුමන් ලෙස ඉතිහාසයට එක් වෙමින් ශුද්ධෝත්තම ෆ්‍රැන්සිස් හිමිපාණන් අද සිය දේව මෙහෙය පැවැත්වීය. ඒ, අබුඩාබිහි සයිඩ් ක්‍රිඩාංගණයේ ස්ථාපිත කර තිබූ විශේෂ පීඨිකාවේදී ය. එම දේව මෙහෙය සඳහා බැතිමතුන් 135000කට අධික පිරිසක් එක්ව සිටි බව විදෙස් මාධ්‍ය වාර්තා කළේ ය. දින තුනක සංචාරයක් සඳහා ශුද්ධෝත්තම ෆ්‍රැන්සිස් හිමිපාණන් අරාබිකරයට පැමිණයේ පසුගිය ඉරිදා දිනයේයි. ඒ, අරාබිකරයේ සංචාරයක නිරත පළමු පාප්තුමන් ලෙස ඉතිහාසයට එක් වෙමිනි. උන්වහන්සේගේ ගල්ෆ් සංචාරයේදී මුස්ලිම් නායකයින් මෙන්ම මුස්ලිම් ප්‍රජාව ද හමුවී සාකච්ඡා කර තිබේ. විශේෂයෙන්ම උන්වහස්සේ ලෝක ආගමික නායකයින්ගෙන් ඉල්ලා ඇත්තේ යේමනය, සිරියාව, ඉරාකය සහ ඉරානය තුළ පවතින යුද ගැටුම් සමනය කිරීමට එක්ව කටයුතු කළ යුතු බව ය.