මාධ්‍යවේදී ශ්‍රීපාල් වන්නිආරච්චි ගෞරව නාමයෙන් පිදුම් ලබයි

COLOMBO (News 1st) : 71 වැනි ජාතික දිනයට සමගාමීව 33 වැනි වරට සංවිධානය කෙරෙන ජාතික ,සංස්කෘතික,අධ්‍යාපනික, මාධ්‍ය හා ව්‍යාපාරික සමුළුව අද පෙරවරුවේ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්විණ. ජාතික සමගි සංගමයේ මෙහෙයවීමෙන් පැවැති මෙම සමුළුවට සර්ව ආගමික නායකයින් ඇතුළු විවිධ පාර්ශ්වවල ආරාධිත සම්භාවනීයයන් පිරිසක් සහභාගි වූහ. මෙහිදී ගෞරව සම්මාන ප්‍රදානයක් ද සිදු කෙරිණ. ගෞරව නාම සහ සම්මාන 65 ක් පිරිනැමුණේ ජාතික , ආගමික, සංස්කෘතික ,වෛද්‍ය, සාහිත්‍ය, කලා, අධ්‍යාපන, ව්‍යාපාරික, සමාජ සේවා අංශ තුළින් ජාතික පුනරුදයට දායක වූ විශිෂ්ටයින් පිරිසක් සඳහායි . ජ්‍යෙෂ්ඨ මාධ්‍යවේදී එඩ්වින් ආරියදාස මහතා ද මෙහිදී ගෞරව නාමයකින් පිදුම් ලැබී ය. ජනමාධ්‍යවේදියෙකු ලෙස වසර 24 ක අත්දැකීම් ඇති නිවුස් ෆස්ට් මාධ්‍යවේදී ශ්‍රීපාල් වන්නිආරච්චි මහතාට ද මෙහිදී ගෞරව නාමයක් පිරිනැමිණ. මාධ්‍ය ක්ෂේත්‍රය තුළින් ඔහු සිදු කරන ජනතා හා සමාජ මෙහෙවර උදෙසා මෙලෙස පිරිනැමුණේ කීර්ති ශ්‍රී දේශබන්දු ජනමාධ්‍යශූරී යන ගෞරව නාමයයි.