ඒකීය රාජ්‍ය පිළිගන්න බැහැ - විග්නේෂ්වරන්ගෙන් යළිත් ආන්දෝලනාත්මක ප්‍රකාශයක්

අධිකරණයට අපහාස කිරීමේ චෝදනා යටතේ උතුරු පළාත් හිටපු ප්‍රධාන අමාත්‍ය සී.වී. විග්නේෂ්වරන් මහතා ඇතුළු 3 දෙනෙකුට එරෙහිව පවරා ඇති නඩුවේ තීන්දුව ලබන 13 වන දා ලබා දීමට අභියාචනාධිකරණ විනිසුරු ජනක් ද සිල්වා මහතා අද තීරණය කළේ ය. උතුරු පළාත් හිටපු අමාත්‍ය වී. ඩැනීෂ්වරන් මහතා යළි අමාත්‍ය ධූරයේ පිහිටු වන ලෙසට අභියාචනාධිකරණය විසින් 2018 ජුනි 29 වන දා නිකුත් කළ නියෝගය අනුව කටයුතු නොකිරීම තුළින් අධිකරණයට අපහාසයක් සිදු වී ඇති බව පෙන්වා දෙමින් මෙම නඩුව ගොනු කර තිබිණි. ඒ, සී.වී. විග්නේෂ්වරන්, පී. සිවනේෂන් සහ අනන්දි ශෂිදරන් යන මහත්ම මහත්මීන් වගඋත්තරකරුවන් ලෙස නම් කරමිනි. මේ අතර මාධ්‍යවේදීන් උතුරු පළාත් හිටපු ප්‍රධාන අමාත්‍ය සී.වී. විග්නේෂ්වරන් මහතාගෙන් ඒකීය රාජ්‍ය පිළිගැනීමට කැමති ද යනුවෙන් යොමු කළ ප්‍රශ්නයකට සී.වී. විග්නේෂ්වරන් මහතා පිළිතුරු දුන්නේ එය පිළිගත නොහැකි බව ය.