'සේනා' ආවේ සුළඟින් බව කෘෂිකර්ම අමාත්‍යාංශය කියයි

COLOMBO (News 1st) : සේනා දළඹුවා මෙරටට සුළඟ මගින් පැමිණ ඇති බව, සිදුකළ පරීක්ෂණවලින් තහවුරු වී ඇති බව කෘෂිකර්ම අමාත්‍යාංශය පවසයි. අමාත්‍ය පී හැරිසන් මහතා සඳහන් කළේ, කෘෂි විශේෂඥයින් ඒ බව තහවුරු කර ඇති බවයි. සේනා දළඹුවාගේ සළඹ අවස්ථාවේ සුළඟ සමග කිලෝමීටර් 100 කට වැඩි දුරක් ගසාගෙන යෑමට හැකි නිසා සේනා දළඹුවා ඉන්දියාවේ සිට පැමිණෙන්නට ඇතැයි සැකකරන බව ද අමාත්‍යවරයා සඳහන් කළේ ය. මේ අතර සේනා දළඹු හානියෙන් වගා හානි වු ගොවීන් සඳහා වන්දි ලබා දීම කඩිනමින් ආරම්භ කරන බව ද අමාත්‍ය පී. හැරිසන් මහතා ප්‍රකාශ කළේ ය. සේනා දළඹුවන්ගෙන් හානියට පත් වගා බිම් පිළිබඳ නිව්ස්ෆස්ට් ආරම්භ කළ අධ්‍යනයේ දෙවන ක්‍රියාන්විතයේ කණ්ඩායම් අද දිස්ත්‍රික් මට්ටමින් ගොවී ජනතාව හමුවීමට නියමිතයි. පේරාදෙණිය කෘෂිකර්ම දෙපාර්තමේන්තුවේදී විශේෂ වැඩමුළුවකට ඊයේ සහභාගී වූ නිවුස්ෆස්ට් කණ්ඩායම කෘෂිකර්ම නිලධාරීන් ද සමග අද දිනයේ ගොවීන් දැනුම්වත් කරනු ලබයි.