රත්නපුරයට උපරිම උෂ්ණත්වයක්..

COLOMBO (News 1st) : ප්‍රදේශ රැසක උෂ්ණත්වය සාමාන්‍ය අගයට වඩා සෙල්සියස් අංශක 2-4 ත් අතර අගයකින් ඉහළ ගොස් ඇති බව කාලගුණ විද්‍යා දෙපාර්තමේන්තුව පවසයි. එම දෙපාර්තමේන්තුවේ දත්තවලට අනුව අද උදෑසන 8.30 න් අවසන් වූ ගෙවුණු පැය 24 තුළ දහවල් කාලය තුළ උපරිම උෂ්ණත්වය වාර්තා වන්නේ රත්නපුරයෙනි. එය සෙල්සියස් අංශක 35.6 කි. දහවල් කාලය තුළ උපරිම උෂ්ණත්වය කුරුණෑගල සහ පුත්තලම ප්‍රදේශවල සාමාන්‍ය අගයට වඩා සෙල්සියස් අංශක 04 කින් ද ,බදුල්ල ,කටුගස්තොට ,ත්‍රිකුණාමලය සහ වව්නියාව ප්‍රදේශවල සාමාන්‍ය අගයට වඩා සෙල්සියස් අංශක 03 කින් ද ඉහළ ගොස් තිබේ. මඩකළපුව, හම්බන්තොට, යාපනය, මහඉලුප්පල්ලම සහ මන්නාරම ප්‍රදේශවල ද දහවල් කාලය තුළ උෂ්ණත්වය සෙල්සියස් අංශක 2 කින් ඉහළ ගොස් ඇතැයි කාලගුණ විද්‍යා දෙපාර්තමේන්තුව ප්‍රකාශ කළේ ය. එම දෙපාර්තමේන්තුව සඳහන් කළේ, රාත්‍රි කාලය තුළ අවම උෂ්ණත්වය අනුරාධපුරය ,මඩකළපුව, හම්බන්තොට සහ වව්නියාව ප්‍රදේශවල සෙල්සියස් අංශක 03 කින් ඉහළ ගොස් ඇති බවයි. කොලඹ ,ගාල්ල, කටුගස්තොට , මහඉලුප්පල්ලම ,නුවරඑළිය සහ රත්නපුර ප්‍රදේශවලද රාත්‍රි කාලය තුළ උෂ්ණත්වය සාමාන්‍ය අගයට වඩා සේලසියස් අංශක 2 කින් ඉහළ ගොස් ඇතැයි කාලගුණ විද්‍යා දෙපාර්තමේන්තුව සඳහන් කළේ ය.