පුද්ගල ඝාතන සහ කොල්ල කෑම් කිහිපයකට අවශ්‍ය කර සිටි ආමි නාලක අත්අඩංගුවට

COLOMBO (News 1st) - පුද්ගල ඝාතන සහ කොල්ල කෑම් කිහිපයකට අවශ්‍ය කර සිටි ආමි නාලක නමැති සංවිධානාත්මක අපරාධකරුවෙකු පෑලියගොඩදී අත්අඩංගුවට ගෙන තිබේ. පොලීසිය සඳහන් කළේ, පෑලියගොඩ දිසා අපරාධ කොට්ඨාසයේ නිලධාරීන් කළ මෙහෙයුමකදී සැකකරු සමග බිරිඳ ද අත්අඩංගුවට ගත් බව ය. ඔහු සන්තකයේ තිබී හෙරොයින් ග්‍රෑම් 5යි මිලිග්‍රෑම් 220 ක් සොයා ගෙන තිබේ. සැකකරු ගිනිඅවියකින් වෙඩි තබා ජා-ඇළ ප්‍රදේශයේ රන් භාණ්ඩ අලෙවි සලක් කොල්ල කෑම සහ අලුත්කඩේ මහේස්ත්‍රාත් අධිකරණ භූමිය ඉදිරිපිටදී පුද්ගලයෙකුට වෙඩි තබා ඝාතනය කිරීමට තැත් කිරීම යන චෝදනා එල්ල වූවෙකි. ඔහුගේ බිරිඳ අත්අඩංගුවට ගෙන ඇත්තේ, ඊට ආධාර අනුබල දීමේ චෝදනා මත ය. අදාළ සැකකරු දරුණු ඝණයේ අපරාධකරුවෙකු වන වැල්ලේ සුරංග නමැත්තාගේ හෙරොයින් සහ අයිස් මත්ද්‍රව්‍ය බෙදා හරින ප්‍රධානතම ගෝලයා බව ද පොලීසිය සඳහන් කළේ ය. ඔවුන් අවුරුදු 29 සහ 26 යන වයස්වල පසුවන හැඳල ප්‍රීතිපුර ප්‍රදේශයේ පදිංචිකරුවන් ය. සැකකරුවන් අද අලුත්කඩේ මහේස්ත්‍රාත් අධිකරණයට ඉදිරිපත් කිරීමට නියමිත ය.