වෙළඳසල් 2175කට නඩු

COLOMBO (News 1st) : උත්සව සමය ඉලක්ක කර ගනිමින් දිවයින පුරා සිදු කළ වැටලීම්වලින් වෙළඳසල් හිමියන් 2175 නඩු පැවරීමට පියවර ගෙන ඇතැයි, පාරිභෝගික කටයුතු පිළිබඳ අධිකාරිය පවසයි. එහි අධ්‍යක්ෂ ජනරාල් එම්.එස්.එම්. ෆවුසර් මහතා සඳහන් කළේ, සිදුකළ වැටලීම්වලදී දඩ වශයෙන් වෙළඳසල් හිමියන්ගෙන් රුපියල් 98 ලක්ෂ දස දහසක මුදලක් අය කර ගෙන ඇති බවයි. පාරිභෝජනයට නුසුදුසු ආහාර අළෙවි කිරීම , ප්‍රමිතියෙන් තොර පොලිතින් , වැඩි මිලට භාණ්ඩ අළෙවි කිරිම, කල් ඉකුත් වූ ආහාර අළෙවි කිරීම , ඇසුරුම්වල ලේබල් ඉවත් කර භාණ්ඩ අළෙවි කිරිම සම්බන්ධයෙන් එම නඩු පවරා තිබේ. උත්සව සමය වෙනුවෙන් පාරිභෝගික කටයුතු අධිකාරිය දිවයින පුරා පිහිටි වෙළඳසල් පරීක්ෂාව ආරම්භ කළේ, පසුගිය නොවැම්බර් 15 වැනිදායි. එය ලබන වසරේ 15 වැනිදා දක්වා ක්‍රියාත්මක වේ. පසුගිය නොවැම්බර් 15 සිට ඊයේ දිනය දක්වා පාරිභෝගික කටයුතු පිළිබඳ අධිකාරිය සිදුකර ඇති වැටලීම් සංඛ්‍යාව 2742කි.