ලක්ෂ 30ක් වටිනා ගංජා තොගයක් ගම්පොළදී පොලිස් භාරයට

COLOMBO (News 1st) - වැල්ලවායේ සිට මහනුවරට ප්‍රවාහනය කරමින් තිබූ ගංජා කිලෝග්‍රෑම් 13ක් අද පෙරවරුවේ පොලිස් භාරයට ගැනිණි. ඒ, ගම්පොළ නගරයේදී ය. උඩුනුවර වෙලම්බඩ පොලීසියට ලද තොරතුරකට අනුව මෙම වැටලීම සිදු කර තිබේ. පොලීසිය පැවසුවේ, පෙට්ටියක අසුරා රස කැවිලි ප්‍රවාහනය කරන මුවාවෙන් මෙම ගංජා තොගය රැගෙන ගොස් ඇති බව ය. රුපියල් ලක්ෂ 30කට අධික වටිනා කමකින් යුත් ගංජා තොගය කුඩා අසුරණ 13ක වෙන් වෙන්ව අසුරා තිබිණි. පොලීසිය පවසන්නේ, පොදු ප්‍රවාහන සේවා ඔස්සේ දිගු කලක සිට මෙම ජාවාරම සිදු කර ඇති බව ය. ගංජා සමග පුද්ගලයින් දෙදෙනෙකු සැකපිට අත්අඩංගුවට ගැනුණු අතර වැල්ලවායේ පදිංචි ඔවුන්ගේ වයස අවුරුදු 27ක් සහ 39කි. සැකකරුවන් ගම්පහ මහේස්ත්‍රාත් අධිකරණයට ඉදිරිපත් කිරීමට නියමිත ය.