වරාය හා ගුවන් සේවා අමාත්‍යංශය, මිහින් ලංකා වෙත දුන් මිලියන 300ක ණය ගෙවා නැතැයි හෙළි වෙයි

COLOMBO (News 1st) - වරාය හා ගුවන් සේවා අමාත්‍යංශය මිහින් ලංකා ගුවන් සේවයට ලබා දුන් රුපියල් මිලියන 300ක ණය මුදල හා පොළිය ආපසු ගෙවා නැතැයි සමාගමේ ගනුදෙනු විමර්ශනය කරන ජනාධිපති කොමිසමේදී අද අනාවරණය විය. එහිදී හෙළි වූයේ, මෙම ණය මුදලට අදාළව රුපියල් මිලියන 37ක පොළී ආදායමක් ගුවන් සේවා අමාත්‍යංශයට ගෙවිය යුතුව ඇති බව ය. නමුත් මෙම පොළිය යළි ගෙවිය යුතු නැතැයි ආචාර්ය සුරේන් බටගොඩ මහතාගේ නියෝගය මත තීරණය කර තිබේ. ඔහු එවක මහා භාණ්ඩාගාරයේ රාජ්‍ය ව්‍යාපාර දෙපාර්තමේන්තුවේ අධ්‍යක්ෂ ජෙනරාල්වරයා ලෙස කටයුතු කර ඇතැයි ද අද අනාවරණය විය. කොමිසම හමුවේ අද සාක්ෂි දුන්නේ මහා භාණ්ඩාගාරයේ රාජ්‍ය ව්‍යාපාර දෙපාර්තමේන්තුවේ අධ්‍යක්ෂවරියකි.