ශ්‍රී ලංකාව - සීෂෙල්ස් අතර නව ගිවිසුම් දෙකක්

COLOMBO (News 1st) : සීෂෙල්ස් රාජ්‍යයේ දෙදින නිල සංචාරයක නිරත ජනාධිපති මෛත්‍රීපාල සිරිසේන මහතා අද එරට උප ජනාධිපති වින්ස්ටන්ට් මෙරිටන්ට් මහතා හමුවීමට නියමිතව තිබේ. ජනාධිපති මාධ්‍ය අංශය සඳහන් කළේ, අද දහවල් එම හමුව සිදුවනු ඇති බවයි. ජනාධිපතිවරයා, සංචාරය අතරතුර යුනෙස්කෝ ලෝක උරුම නැරඹීමට ද එක්වනු ඇතැයි, ජනාධිපති මාධ්‍ය අංශය සඳහන් කළේ ය. මේ අතර ජනාධිපති මෛත්‍රීපාල සිරිසේන මහතා ඊයේ පස්වරුවේ එරට ජනාධිපති ඩැනී ෆෝ මහතා හමුවිය. එහිදි දෙරටේ නායකයන් වෙළඳ සහ සංචාරක සබඳතා නව ක්ෂේත්‍ර ඔස්සේ ව්‍යාප්ත කරමින් ශක්තිමත් ලෙස ඉදිරියට ගෙන යාම පිළිබඳව දීර්ඝ ලෙස සාකච්ඡා කර තිබේ. රටවල් දෙක අතර ව්‍යාපාරික සංසදවල සබඳතා වැඩිදියුණු කර ගනිමින් ඉදිරි කටයුතු සිදු කිරිම පිළිබඳව අදාළ අංශවලට උපදෙස් ලබා දෙන බව ද ජනාධිපති මෛත්‍රිපාල සිරිසේන මහතා මෙහිදි සඳහන් කර ඇත. දෙරට අතර අන්‍යෝන්‍ය වශයෙන් වැදගත් ද්වි පාර්ශික මෙන්ම කලාපිය කරුණු රැසක් පිළිබදවද මෙහිදි සාකච්ඡාවට බදුන්වී ඇතැයි ජනාධිපති මාධ්‍ය අංශය පැවසී ය. එහිදි අදහස් දක්වමින් සීෂෙල්ස් ජනාධිපති ඩැනී ෆෝ මහතා ප්‍රකාශ කර ඇත්තේ , ඉන්දියානු කලාපීය කවුන්සිලයේ සාමාජිකත්වය ලබා ගැනීම සඳහා ශ්‍රී ලංකාවට උපරිම සහයෝගය ලබා දෙන බවයි. මේ අතර දෙරට අතර ද්විපාර්ශවීය සබඳතා ශක්තිමත් කෙරෙන නව ගිවිසුම් දෙකකට ද ඊයේ අත්සත් තැබිණ. තොරතුරු තාක්ෂණ සහයෝගීතාව ඉහළ නංවා ගැනීම හා වෘත්තිය පුහුණු ක්ෂේස්ත්‍රයේ සහයෝගිතාව ඉහළ නංවා ගැනීමට අදාළව මෙම ගිවිසුම් අත්කර තිබේ.