දුම්රිය තුළ අනවසර වෙළෙඳාම් සහ සිඟමනේ යෙදුණු 15ක් අත්අඩංගුවට

COLOMBO (News 1st) - දුම්රිය තුළ අනවසර වෙළෙඳාම් කළ සහ සිඟමන් යැදීම සම්බන්ධයෙන් පුද්ගලයින් 15 දෙනෙකු අත්අඩංගුවට ගෙන තිබේ. ඒ, සතියක් තුළ කළ වැටලීම්වලදී ය. දුම්රිය දෙපාර්තමේන්තුව සඳහන් කළේ, ඔවුන්ට එරෙහිව දුම්රිය ආඥා පනතේ 12 වන වගන්තිය යටතේ මගීන්ට කරදර කිරීමේ චෝදනාව යටතේ නඩු පවරා ඇති බව ය. දුම්රිය තුළ සහ දුම්රිය ස්ථානවල අනවසර වෙළෙඳාම් කිරීම සහ සිඟමන් යැදීම මෙම මස පළමු වන දා සිට සපුරා තහනම් ය. ඒ පිළිබඳ පැමිණිලි ඇත්නම් 0112 33 66 14 අංකයෙන් දුම්රිය ආරක්ෂක හමුදා මෙහෙයුම් ඒකකයට දැනුම් දිය හැකි ය.