සති 3ක් තුළ ක්‍රියාත්මක කළ මෙහෙයුම්වලින් අපරාධවලට සම්බන්ධ සැකකරුවන් 16ක් අත්අඩංගුවට

COLOMBO (News 1st) - සති 3ක් තුළ ක්‍රියාත්මක කළ මෙහෙයුම්වලින් සංවිධානාත්මක අපරාධවලට සම්බන්ධ සැකකරුවන් 16 දෙනෙකු අත්අඩංගුවට ගෙන ඇතැයි පොලිස් විශේෂ කාර්ය බලකාය පවසයි. එහි ජ්‍යේෂ්ඨ නිලධාරියෙකු සඳහන් කළේ, ඉන් 08 දෙනෙකු අංගොඩ ලොක්කාගේ සහ මාකදුරේ මදූෂ්ගේ ගෝලයින් බවට තහවුරු වී ඇති බව ය. මේ වන විට දිවයින පුරා සංවිධානාත්මක අපරාධ නිවාරණ කොට්ඨාසයට අයත් කඳවුරු 63ක් ක්‍රියාත්මක බව ද ඔහු වැඩිදුරටත් සඳහන් කළේ ය. ඔහු පැවසුවේ, මේ අතරින් සැකකරුවන් 10 දෙනෙකු රක්ෂිත බන්ධනාගාරගත කර ඇති අතර 6 දෙනෙකු සංවිධානාත්මක අපරාධ නිවාරණ කොට්ඨාස නිලධාරීන්ගේ භාරයේ රඳවා තබා ගෙන ප්‍රශ්න කරගෙන යන බව ය. මේ අතරින් වැඩි පිරිසක් බස්නාහිර, දකුණු සහ මධම පළාතේ සිදු කළ මෙහෙයුම්වලදී අත්අඩංගුවට ගත් බව ඔහු සඳහන් කළේ ය. මෙම මෙහෙයුමේදී ගිනිඅවි 8ක් හෙරොයින් කිලෝග්‍රෑම් 05ක් සහ කේරළ ගංජා කිලෝ 300කට අධික ප්‍රමාණයක් සොයා ගෙන තිබේ.