ශ්‍රී.ල.නි.ප. මධ්‍යම කාරක සභාව ජනපති ප්‍රධානත්වයෙන් රැස්වෙයි

COLOMBO (News 1st) - ශ්‍රී ලංකා නිදහස් පක්ෂයේ මධ්‍යම කාරක සභාව ජනාධිපති නිල නිවසේදී අද රාත්‍රියේ පැවැත්විණි. ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පැවති මධ්‍යම කාරක සභා රැස්වීම පැය 2කට අධික කාලයක් පැවති බව අප වාර්තාකරු පැවසුවේ ය. මධ්‍යම කාරක සභා රැස්වීමෙන් පසුව පිටව ගිය මන්ත්‍රීවරුන් මාධ්‍ය වෙත පැවසුවේ, ශ්‍රී ලංකා නිදහස් පක්ෂයේ ඉදිරි ප්‍රතිසංධාන වැඩපිළිවෙළ පිළිබඳව මෙහිදී සාකච්ඡා වූ බව ය. එමෙන් ම ශ්‍රී ලංකා නිදහස් පක්ෂය ජාතික ආණ්ඩුවෙන් ඉවත් වීම සම්බන්ධයෙන් අද පැවති මධ්‍යම කාරක සභා රැස්වීමේදී සාකච්ඡා වී නොමැත. හිටපු පාර්ලිමේන්තු මන්ත්‍රී ශාන්ත බණ්ඩාර මහතා පැවසුවේ, මෙහිදී පසුගියදා ශ්‍රී ලංකා නිදහස් පක්ෂයේ මහ ලේකම් ධූරයට පත් වූ මහාචාර්ය රෝහන ලක්ෂ්මන් පියදාස මහතා ඇතුළු මහාචාර්යවරු සිව් දෙනෙකුට ජනපති අතින් ශ්‍රී ලංකා නිදහස් පක්ෂ මධ්‍යම කාරක සභා සාමාජිකත්වය ලබා දුන් බව ය. එම මහාචාර්යවරු අතර විශ්වවිද්‍යාල ප්‍රතිපාදන කොමිෂන් සභාවේ සභාපතිවරයා ද සිටීම විශේෂත්වයකි.