රත්නපුරට ඇද හැළෙන වර්ෂාව හේතුවෙන් කළු ගඟේ ජල මට්ටම ඉහළට: විමසිලිමත් වන්නැයි ජනතාවට උපදෙස්

COLOMBO (News 1st) - රත්නපුර දිස්ත්‍රික්කයට ඇද හැළෙන වර්ෂාව හේතුවෙන් කළු ගඟේ ජල මට්ටම ඉහළ යමින් පවතින බව ආපදා කළමනාකරණ මධ්‍යස්ථානය පවසයි. එහි සහකාර අධ්‍යක්ෂ ප්‍රදීප් කොඩිප්පිලි මහතා සඳහන් කළේ, රත්නපුර නගරයෙන් හා මිල්ලකන්ද ප්‍රදේශවල ජල මට්ටම ඉහළ යමින් පවතින බව ය. ඒ හේතුවෙන් රත්නපුර හා මිල්ලකන්ද ප්‍රදේශවල ජනතාවට විමසිලිමත්ව සිටින්නැයි ආපදා කළමනාකරණ මධ්‍යස්ථානය ජනතාවගෙන් ඉල්ලා සිටියි. මේ අතර නිරිත දිග මොසම සක්‍රීය වීම හේතුවෙන් දිවයිනේ බස්නාහිර, සබරගමුව, දකුණ, මධ්‍යම සහ වයඔ පළාත්වලට විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව පවසයි. කාර්යේ නියුතු කාලගුණ විද්‍යාඥ චතුස්කා ප්‍රේමචන්ද්‍ර මහත්මිය සඳහන් කළේ සබරගමුව, බස්නාහිර සහ මධ්‍යම පළාත්වලටත් ගාල්ල සහ මාතර දිස්ත්‍රික්කවලත් ඇතැම් ස්ථානවලට මිලිමීටර් 100ට වැඩි තද වැසි ඇති විය හැකි බව ය.