මාකඳුරේ මධුෂ් සහ කෙසෙල්වත්තේ දිනුක අත්අඩංගුවට ගැනීමට රතු නිවේදන

COLOMBO (News 1st) - ප්‍රබල පාතාල නායකයින් දෙදෙනෙකු වන මාකඳුරේ මධුෂ් සහ කෙසෙල්වත්තේ දිනුක අත්අඩංගුවට ගැනීම සඳහා රතු නිවේදන නිකුත් කරන බව පොලිස් විශේෂ කාර්ය බලකාය පවසයි. පොලිස් විශේෂ කාර්ය බලකායේ ජ්‍යේෂ්ඨ නිලධාරියෙකු සඳහන් කළේ, සංවිධානාත්මක අපරාධ විමර්ශන ඒකකය හරහා ජාත්‍යන්තර පොලීසිය මගින් අත්අඩංගුවට ගැනීමට රතු නිවේදන නිකුත් කිරීමට නියමිත බව ය. මාකඳුරේ මධුෂ් සහ කෙසෙල්වත්තේ දිනුක ඩුබායිහි සිටින බව පොලිස් විශේෂ කාර්ය බලකාය මේ වන විටත් තහවුරු කර ගෙන අවසන් ය. මේ අතර දිවයිනේ ඕනෑ ම ප්‍රදේශයක සිදුවන අපරාධයක් පිළිබඳ තොරතුරු පහත දුරකතන අංක ඇමතීමෙන් පොලිස් විශේෂ කාර්ය බලකායට ලබා දිය හැකි ය. 0112 580 518, 0112 500 741, 0112 589 741.