ප්‍රධාන මාර්ගයේ දුම්රිය ප්‍රමාදයක්

COLOMBO (News 1st) - ප්‍රධාන මාර්ගයේ පොල්ගහවෙල සිට කොළඹ කොටුව දක්වා ධාවනය වන සියලු දුම්රිය ප්‍රමාද වන බව දුම්රිය පාලක මැදිරිය පවසයි. පොලීසිය සඳහන් කළේ, අඹේපුස්ස සහ බෝතලේ දුම්රිය ස්ථාන අතර දුම්රිය මාර්ගය හරහා මළ සිරුරක් තිබීම හේතුවෙන් රඹුක්කන සිට මොරටුව දක්වා ධාවනය වූ දුම්රිය නතර කර ඇති බව ය. පසුව අඹේපුස්ස දුම්රිය ස්ථානයේ නිලධාරීන් මේ පිළිබඳව පොලීසියට දැනුම් දී තිබිණි. පොලීසිය පැමිණෙන තුරු මොරටුව බලා ධාවනය වූ දුම්රිය ඇතුළු දුම්රිය 6ක් පමණ එම ස්ථානයේ නතර කර තැබීමට සිදු විය. තමුන්ට කාර්යාල බලා පිටත් වීමට ප්‍රමාද වන බව පවසමින් ඊට දුම්රිය මගීන් විරෝධය පළ කර තිබේ. කෙසේ වෙතත් පසුව පොලීසිය පැමිණ මළ සිරුර ඉවත් කිරීමත් සමග දුම්රිය ධාවනය කරවීමට කටයුතු යොදා ඇතැයි පාලක මැදිරිය සඳහන් කළේ ය. මේ හේතුවෙන් පොල්ගහවෙල සිට කොළඹ කොටුව දක්වා පැමිණෙන සියලු දුම්රිය ප්‍රමාද වේ.