චීනයට ආනයන බදු පැනවීමට අමෙරිකාව සැරසෙයි

(News 1st) - චීනයට ආනයන බදු පැනවීමට අමෙරිකාව සූදානම් වන බව වාර්තා වේ. ජූනි මාසයේ සිට චීනයට 25%ක ආනයන බද්දක් පැනවීමට අමෙරිකානු ජනපති ඩොනල්ඩ් ට්‍රම්ප් සූදානම් වන බව විදෙස් වාර්තාහි දැක්වේ. මේ අනුව ඩොලර් බිලියන 50ක වටිනාකමින් යුත් චීන ආනයන සඳහා මෙම නව බදු පැනවෙනු ඇති. මේ සම්බන්ධයෙන් විචාරකයින්ගෙන් එල්ල වන චෝදනාවන්ට ප්‍රතිචාර දක්වමින් අමෙරිකානු භාණ්ඩාගාර ලේකම් ස්ටීවන් ම්නුචින් ප්‍රකාශ කළේ, දෙපාර්ශවය අතර වෙළෙඳ සාකච්ඡා අඛණ්ඩව පවත්වන බව ය. බදු පැනවෙන භාණ්ඩ ලැයිස්තුව ජූනි 15 වන දාට පෙර නිවේදනය කරන බව ධවල මන්දිරය වැඩිදුරටත් පවසා තිබේ. මේ අතර අද උදෑසන පළවූ මෙම පුවත සම්බන්ධයෙන් චීනය අදහස් දක්වා ඇත්තේ, තමන් අමෙරිකාවේ මෙම තීරණය ගැන පුදුමයටත්, අනෙක් අතට පුදුමයට පත් නොවන බව ය.