පසුගිය වසරේ වැටලීම්වලින් ප්‍රසිද්ධ ස්ථානවල දුම්පානය කළ 2078 දෙනෙකු අත්අඩංගුවට

COLOMBO (News 1st) - පසුගිය වසරේ සිදු කළ වැටලීම්වලින් ප්‍රසිද්ධ ස්ථානවල දුම්පානය කළ පුද්ගලයින් 2078 දෙනෙකු අත්අඩංගුවට ගත් බව සුරාබදු දෙපාර්තමේන්තුව සඳහන් කළේ ය. එම දෙපාර්තමේන්තුව පැවසුවේ, මෙම වැටලීම්වලදී බාල වයස්කරුවන්ට දුම්වැටි අලෙවි කළ පුද්ගලයින් 2378 දෙනෙකු ද අත්අඩංගුවට ගත් බව ය. පසුගිය වසරේ සුරාබදු අපරාධ හඳුනා ගැනීම සඳහා වැටලීම් 50000කට අධික සංඛ්‍යාවක් සිදු කර ඇති අතර ඉන් අත්අඩංගුවට ගත් පුද්ගලයින් සංඛ්‍යාව 44059කි. මේ අතුරින් පුද්ගලයින් 43550 දෙනෙකුට එරෙහිව සුරාබදු දෙපාර්තමේන්තුව නඩු පවරා තිබේ. ඉන් අය කර ගත් මුදල රුපියල් මිලියන 191කි. සුරාබදු දෙපාර්තමේන්තුවේ මාධ්‍ය ප්‍රකාශක කපිල කුමාරසිංහ මහතා සඳහන් කළේ, ප්‍රසිද්ධ ස්ථානවල දුම්පානය කරන්නන් අත්අඩංගුවට ගැනීමේ මෙහෙයුම් අඛන්ඩව ක්‍රියාත්මක බව ය.