ඉදිරි පැය කිහිපයේ පළාත් රැසකට මහ වැසි

COLOMBO (News 1st) : නැගෙනහිර, බස්නාහිර, සබරගමුව, මධ්‍යම, වයඹ සහ දකුණු පළාත්වල ඇතැම් ස්ථානවලට ඉදිරි පැය 8 තුළදී ගිඟුරුම් සහිත වැසි සමග ප්‍රබල අකුණු ඇතිවිය හැකි බව කාලගුණවිද්‍යා දෙපාර්තමේන්තුව පවසයි. එම දෙපාර්තමේන්තුව සඳහන් කළේ, ඇතැම් ස්ථාවලට මිලිමීටර් 100 ක පමණ තද වැසි අපේක්ෂා කළ හැකි බවයි. ගිඟුරුම් සහිත වැසි සමග පැයට කිලෝමීටර් 70-80 අතර කෙටි කාලීන තද සුළං ඇතිවිය හැකි හැකි අතර අකුණු මගින් සිදුවිය හැකි අනතුරු අවම කිරීමට අවශ්‍ය පියවර ගන්නා ලෙස ද ජනතාවගෙන් ඉල්ලා සිටී. මේ අතර උතුර, නැගෙනහිර,ඌව පළාත සහ පොළොන්නරුව දිස්ත්‍රික්කයට හෙට දිනයේ උණුසුම් කාලගුණ තත්ත්වයක් ඇතිවිය හැකි බව කාලගුණ විද්‍යා දෙපාර්තමේන්තුව නිවේදනය කරයි. එම දෙපාර්තමේන්තුව සඳහන් කළේ, ඒ පිළිබඳව වැඩබිම් තුළ සිටින ජනතාව, නිවෙස්වල සිටින වැඩිහිටි සහ රෝගී පුද්ගලයින් අවධානය යොමු කරන ලෙසයි.