කැලණිය සරසවිය ඉදිරිපිට පැවති සිසු උද්ඝෝෂණය අවසන්

COLOMBO (News 1st) - මාර්ගය අවහිර කරමින් කැලණිය විශ්වවිද්‍යාලය ඉදිරිපිට පැවති සිසු උද්ඝෝෂණය අවසන් කර තිබේ. කැලණිය විශ්වවිද්‍යාලයේ මහා ශිෂ්‍ය සංගමය මෙම උද්ඝෝෂණය සංවිධාන කර තිබිණි. ඔවුන් පවසන්නේ, මිලිටරි බලය යොදාගෙන නිදහස් අධ්‍යාපනයට, නිදහස් සෞඛ්‍ය සේවයට බලපෑම් කිරීමට ඉදිරිපත් කර ඇති පනත වහා ඉවත් කර ගන්නා ලෙස ය. අද පෙරවරුවේ ආරම්භ කළ මෙම විශ්වවිද්‍යාල සිසුන්ගේ විරෝධතාව හේතුවෙන් මහනුවර - කොළඹ ප්‍රධාන මාර්ගයේ දැඩි රථ වාහන තදබදයක් ද හට ගත්තේ ය. ඒ, විරෝධතාවයේ නිරත වූ සිසුන් නුවර - කොළඹ මාර්ගය කැලණිය විශ්වවිද්‍යාලය ඉදිරිපිටින් අවහිර කිරීම හේතුවෙනි. මේ හේතුවෙන් පැයක පමණ කාලයක් නුවර දෙසට දැඩි රථ වාහන තදබදයක් ද පැවති බව අප වාර්තාකරු පැවසුවේ ය.