ඇල්ජීරියාවට තෙ දිනක ශෝක කාලයක්

COLOMBO (News 1st) : ඇල්ජීරියාවේ සිදු වූ මාරාන්තික ගුවන් අනතුර හේතුවෙන් එරට රජය දින 3ක ශෝක කාලයක් ප්‍රකාශයට පත්කර තිබේ. එරට බලධාරීන් පවසන්නේ ඇල්ජීරියාවේ සිදුවූ දරුණුතම ගුවන් ආපදාව වන මෙම අනතුර සම්බන්ධයෙන් පරීක්ෂණ ආරම්භ කර ඇති බවයි. හමුදා ගුවන් යානයක් කඩා වැටීමෙන් සිදු වූ අනතුරින් මියගිය 257 දෙනා අතුරින් බහුතරය හමුදා සාමාජිකයින් සහ ඔවුන්ගේ පවුල්වල සාමාජිකයින් බවද ඇල්ජීරියානු බලධාරීන් ය. විදෙස් වාර්තා අනාවරණ කළේ, යානය ඇල්ජීරියාවේ, ඇල්ජියස් අගනුවර පිහිටි හමුදා කඳවුරෙන් ගුවන්ගතකර මද වේලාවකට පසු අනතුර සිදුව ඇති බවයි. අනතුරට හේතුව මෙතෙක් අනාවරණය වී නොමැත. ඇල්ජීරියා හමුදා ප්‍රධානියා සඳහන් කළේ, අනතුරට හේතුව සොයා විශේෂ විමර්ශනයක් ක්‍රියාත්මක බවයි. එමෙන්ම මියගිය පුද්ගලයින්ගේ පවුල්වල ඥාතීන් වෙත කනගාටුව ප්‍රකාශ කරමින් ඇල්ජීරියා ආරක්ෂක අංශ විශේෂ නිවේදනයක් නිකුත් කර තිබේ. 2014 පෙබරවාරි මාසයේදී ද ඇල්ජිරියාවේ සිදුවූ ගුවන් යානා අනතුරින් 77 දෙනෙකු මියගිය අතර එක් අයකු දිවි බේරා ගැනීමට සමත් විය.