රුසියානු ක්‍රියාකරුවන් සමග තම සමාගම නිරන්තර අරගලයක යෙදී සිටින බව මාර්ක් සකර්බර්ග් කියයි

(Newsfirst) - සමාජ මාධ්‍ය ජාලය ගසා කෑමට උත්සහ දරණ රුසියානු ක්‍රියාකරුවන් සමග තම සමාගම නිරන්තර අරගලයක යෙදී සිටින බව ෆෙස්බුක් සමාගමේ ප්‍රධාන විධායක නිලධාරී මාර්ක් සකර්බර්ග් පවසයි. අමෙරිකානු සෙනෙට් සභිකයින් හමුවේ ඔහු එසේ කියා සිටියේ, කේම්බ්‍රිජ් ඇනලිටිකා සිද්ධිය සම්බන්ධයෙන් කෙරෙන ප්‍රශ්න කිරීම් හමුවේ ය. එය අවි තරගයක් බවත් ඔවුන් යහපත් තත්ත්වයකට ගෙන ඒමට අවැසි බවත් ෆෙස්බුක් නිර්මාතෘ මාර්ක් සකර්බර්ග් එහිදී වැඩිදුරටත් කියා සිටියේ ය. ෆේස්බුක් සමාගමේ කාර්ය මණ්ඩලය මෙලෙස ප්‍රශ්න කිරීම්වලට භාජනය කෙරුනේ, 2016 වසරේ පැවති අමෙරිකානු ජනපතිවරණයේදී ඊට රුසියාව මැදිහත් වූ බවට අනාවරණය වීමෙන් අනතුරුව ය.