අද පැවැත්වීමට නියමිතව තිබූ නිදහස් පක්ෂ මධ්‍යම කාරක සභා රැස්වීම අත්හිටුවයි

COLOMBO (Newsfirst) - අද පැවැත්වීමට නියමිතව තිබූ ශ්‍රී ලංකා නිදහස් පක්ෂ මධ්‍යම කාරක සභා රැස්වීම අත්හිටුවා තිබේ. එහි මහ ලේකම් අමාත්‍ය දුමින්ද දිසානායක මහතා ප්‍රකාශ කළේ, මධ්‍යම කාරක සභාව පැවැත්වෙන නිශ්චිත දිනයක් මේ දක්වා තීරණය කර නොමැති බව ය. අග්‍රාමාත්‍යවරයාට එරෙහි විශ්වාසභංග යෝජනාවෙන් පසු ශ්‍රී ලංකා නිදහස් පක්ෂ මධ්‍යම කාරක සභාව පෙරේදා ප්‍රථම වරට ජනාධිපතිතුමාගේ ප්‍රධානත්වයෙන් රැස්විණි. එහිදී විශ්වාසභංගයට පක්ෂව ඡන්දය භාවිත කළ ශ්‍රී ලංකා නිදහස් පක්ෂ ඇමතිවරුන් 16 දෙනා අමාත්‍ය ධූරවලින් ඉවත් වීමට මධ්‍යම කාරක සභාවේ අනුමැතිය ඉල්ලා සිටියහ. ඒ සඳහා අනුමැතිය ලබා දීම පිණිස අද මධ්‍යම කාරක සභාව රැස්වීමට මීට පෙර තීරණය කර තිබිණි.