දීපාවලි වෙනුවෙන් විශේෂ ප්‍රවාහන සේවා - ලංකා ගමනා ගමන මණ්ඩලය

COLOMBO (News 1st) - දීපාවලි උත්සවය වෙනුවෙන් ගමිබිම් බලා ජන ජනතාවගේ පහසුව වෙනුවෙන් විශේෂ ප්‍රවාහන සේවා ආරම්භ කර තිබේ.‍

ඒ වෙනුවෙන් පිටකොටු බෝධිරාජ මාවත බස් පර්යන්තයේ සිට හැටන්, බදුල්ල, නුවරඑළිය , මස්කෙලිය, නානුඔය හා යාපනය ඇතුළු ප්‍රදේශවලට අද (18) දිනයේ අතිරේක බස් රථ 75 ක් යොදවා ඇති බව ලංකා ගමනා ගමන මණ්ඩලයේ නියෝජ්‍ය සාමාන්‍යාධිකාරී (ධාවන) ටී.එච්.ආර්.ටී. චන්ද්‍රසිරි මහතා පැවසුවේ ය.

හෙට (19) ඉරිදා දිනයේ අතිරේක බස් රථ 73 කොළඹ සිට එම ප්‍රදේශවලට  යොදවා ඇති බවද ඔහු පවසන ලදි.

ලංකා ගමනා ගමන මණ්ඩලයේ නියෝජ්‍ය සාමාන්‍යාධිකාරීවරයා පැවසුවේ එම බස් සේවාව 24 පැය පුරා ක්‍රියාත්මක බවය.

ලබන අඟහරුවාද සිට නැවත කොළඹ දක්වා පැමිණෙන ජනතාවට ප්‍රවාහන පහසුකම් සැලසීම සඳහා ලංකා ගමනා ගමන මණ්ඩලයේ ප්‍රාදේශික 12 ට අයත් නිලධාරීන්ට උපදෙස් දී ඇතැයිද පැවසුවේ ය.

මාකුඹුර හා පිටකොටුව බැස්ටියන් මාවතේ සිට දීපාවලි වෙනුවෙන් විශේෂ බස් රථ සේවා ක්‍රියාත්මක බව ජාතික ගමනා ගමන කොමිෂන් සභාවද සඳහන් කරන ලදි.

අද හා හෙට දිනවල සාමාන්‍ය පරිදි දුම්රිය සේවා ක්‍රියාත්මක බව දුම්රිය දෙපාර්තමේන්තුව පැවසුවේ ය.