තායිලන්තයේ ශිනවාත්‍රා පාලන යුගය අවසන් වෙයි ද?... අගමැතිනිය පිළිබඳ අධිකරණ තීන්දුව අද.

COLOMBO (News 1st) - සේවය අත්හිටවූ තායිලන්ත අග්‍රාමාත්‍ය පේටොංටර්න් ෂිනවාත්‍රා පිළිබඳ එරට ව්‍යවස්ථා අධිකරණ තීන්දුව අද(29) නිකුත් කිරීමට නියමිතව තිබේ.

ඇය, අග්‍රාමාත්‍ය ධුරයේ යළි පිහිටුවීම හෝ ධුරයෙන් ඉවත් කිරීම පිළිබඳ තීන්දුව, එරට වේලාවෙන් පස්වරු 3 ට ප්‍රකාශයට පත් කිරීමට නියමිතයි.

කාම්බෝජයේ හිටපු නායක හුන් සෙන් සමග කළ දුරකතන සංවාදයක හඬපට නිකුත් වීමත් සමග ඇයට එරෙහිව දැඩි මහජන විරෝධයක් එල්ල විය.

අනතුරුව ඇයට එරෙහි පෙත්සම් විභාගයක් අවසන් වනතුරු, අග්‍රාමාත්‍ය ධුරයේ කටයුතු කිරීම අත්හිටුවනු ලැබී ය.

ව්‍යවස්ථා අධිකරණය අද(29) ඇය ධුරයෙන් පහ කළහොත්, ශිනවාත්‍රා වංශය බිඳ වැටී තායිලන්තයේ ප්‍රබල දේශපාලන කැළඹීමක් ඇති වනු ඇතැයි දේශපාලන විචාරකයින් පෙන්වා දී තිබේ.

ඒ අනූව පසුගිය දශක දෙක තුළ තායි දේශපාලනයේ ආධිපත්‍ය දැරූ ප්‍රබල ශිනවාත්‍රා පරපුරේ ධුර කාලය සම්පූර්ණ කිරීමට පෙර බලය අහිමි වන තුන්වැනි නායකයා බවට ඇය පත්වනු ඇති.

38 හැවිරිදි පේටොංටර්න් ෂිනවාත්‍රා, තායිලන්ත ඉතිහාසයේ අග්‍රාමාත්‍ය ධුරයක් දැරූ ළාබාලතම පුද්ගලයායි.