අක්මීමනදී පොලිසියට අත්බෝම්බ ප්‍රහාරයක් එල්ල කළ බව කියන සැකකරුවන් රිමාන්ඩ්...

COLOMBO (News 1st) -  ගාල්ල , අක්මීමනදී රථවාහන සෝදිසි මෙහෙයුමක නිරතව සිටි පොලිස් නිලධාරීන්ට අත්බෝම්බ ප්‍රහාරයක් එල්ල කළ බව කියන පුද්ගලයින් දෙදෙනා අත්අඩංගුවට ගෙන ලබන 21 වැනිදා දක්වා රක්ෂිත බන්ධනාගාරගත කර තිබේ.

ඒ, සැකකරුවන් අද (11) ගාල්ල අතිරේක මහේස්ත්‍රාත් ලක්මිණී විදානගමගේ මහත්මිය හමුවට ඉදිරිපත් කිරීමෙන් අනතුරුවයි.

පොලීසිය සඳහන් කළේ , ඊයේ රාත්‍රියේ වලහන්දූව සිට නුගදුව දෙසට ගමන් කරන මාර්ගයේ අතුරු මාර්ගයක යතුරු පැදියක් නතර කර සැක කටයුතු ලෙස දෙදෙනෙකු සිට ඇති බවයි.

පොලිස් නිලධාරීන් ඔවුන් අසලට ගොස් සෝදිසි කිරීමට යාමේදී එක් අයෙක් යතුරු පැදියෙන් පළාගොස් තිබේ. 

එම අවස්ථාවේ අනෙක් පුද්ගලයා පොලිස් නිලධාරීන් දෙසට අත්බෝම්බයක් විසි කිරීමට යාමේදී එක් නිලධාරියෙකු වෙඩි ප්‍රහාරයක් එල්ල කර තිබුණි. 

එහිදී තුවාල ලැබූ 21 හැවිරිදි සැකකරු කරාපිටිය ශික්ෂණ රෝහලට ඇතුළත් කෙරිණ. 

පොලීසිය සඳහන් කළේ , පළාගිය 18 හැවිරිදි යතුරුපැදිකරු පොලිස් මුර සංචාරයේ නිරත නිලධාරීන් විසින් පසුව අත්අඩංගුවට ගත් බවයි.

අදාළ සිදුවීම වූ ස්ථානයේ තිබී T56 උණ්ඩ 105 ක් සහිත පාර්සලයක් සහ විදේශ රටක නිෂ්පාදිත ජීව අත් බෝම්බයක් සොයාගෙන තිබේ. 

රක්ෂිත බන්ධනාගාරගත කරන ලද සැකකරුවන් මීගොඩ ප්‍රදේශයේ පදිංචිකරුවන් ය.