ජාත්‍යන්තර වෙළඳ සබඳතා ගැන අතීත සාධක රැසක් මඩළකපුවෙන් මතුවෙයි

COLOMBO (News 1st) –  පෙරඅපර දෙදිග රටවල් සමග වෙළඳ සබඳතා පැවැත්වූ දියුණු වාණිජ වරායක් ලෙස මඩකළපුව කායන්කර්නි පැරණි වරාය ක්‍රියාත්මක වී ඇති බව පුරාවිද්‍යා කැනීමකින් හෙළිවී තිබේ.

මධ්‍යම සංස්කෘතික අරමුදලේ අධ්‍යක්ෂ ජෙනරාල් මහාචාර්ය ගාමිණි රණසිංහ මහතා සඳහන් කළේ, ක්‍රිස්තු වර්ෂ තුන්වැනි සියවසේ සිට මෙම වරාය දියුණු වරායක් ලෙස ක්‍රියාත්මක වී ඇති බවයි. මෙම වරාය නගර පරිශ්‍රයේ මේ දිනවල පුරාවිද්‍යා පර්යේෂණ කැනීමක් සිදුවෙමින් පවතී. එම කැණීමේදී චීන ,ඉන්දීය ,පර්සියානු හා රෝම මැටි බඳුන් කැබලි රැසක් සොයා ගෙන තිබේ. මිට අමතරව අග්නිදිග ආසියානු රටවල් වන තායිලන්තය බුරුමය ඇතුළු රටවල් කිහිපයක මැටි බඳුන් කැබලි ද සොයා ගත් බව මධ්‍යම සංස්කෘතික අරමුදල ප්‍රකාශ කළේ ය. කැණීම්ලදී වීදුරු නිර්මාණ කිහිපයක නටබුන් ද හමුවී තිබේ. මීට අමතරව යකඩ නිර්මාණ කිහිපයක නටබුන් හමුවී ඇති අතර යකඩ නිස්සාරණය කළ බවට තොරතුරු රැසක් ද කැනීම්වලදී හමුවූ බව මධ්‍යම සංස්කෘතික අරමුදල ප්‍රකාශ කළේ ය. මධ්‍යම සංස්කෘතික අරමුදලේ මඩලකපුව දිස්ත්‍රික් ව්‍යාපෘති කළමණාකරු තිළිණ පල්ලෙතැන්න මහතාගේ අධීක්ෂණය යටතේ කැණීම තවදුරටත් ක්‍රියාත්මකයි.